Read tiv Yobu 15 Bible Online

Yobu 15 - tiv bible

Yobu 15

¹Tsô Elifasa Orteman, gema kaa er:

²Doo u orfankwagh nana or kwagh sha mfe u gbilinigh, nana iv iyav mbu nan a ahumbe a ken ityoughkitaregha?

³Nana sendegh sha kwaghôron u a lu a inja ga, shin sha akaaôron a a wase nan ma kwagh ga?

⁴Een, nahan yô, u ngu bunden mcie u cian Aôndo, shi u ngu nzughul a icivir i ka i civir Aôndo a mi la kpaa.

⁵Gadia ka ifer you i tese zwa wou ye, shi u tsuwa nombor u mbaatsereghev kpaa.

⁶Ka zwa wou je, u ne u ibo ye, ka mo ga! Een, ka zwa wou iyol you je, u lu pasen ibo you ye.

⁷Ka we u lu or u i hii maren nan yee? U vande lun a agunguu?

⁸U ongo mhen u ken myer u Aôndo? U urugh kwaghfan, u ngu a mi, we tswene?

⁹Ka nyi u fe, i se se fe ga? Ka nyi mkav u lu a mi, u se se kav ga?

¹⁰Mbamendenivu kua mbatsan tsung je mba hen a vese, mba tamen a teru ca je.

¹¹Ishimasurun i Aôndo i kuma u ga, kua kwagh u i er a we legh legh la kpaa?

¹²Er nan man ishima you i mgbegh u nahana? Man shi er nan ve u norom ashe,

¹³jijingi wou a hendan a Aôndo je, u rumun akaaôron a dugh u ken zwa nahana?

¹⁴Or ngu nyi je, u nana lu wang? Man shi u kwase a mar nan, nana lu perapera?

¹⁵Nenge, A kera suur sha uicighanmbaiorov la ga; een, Usha kpaa kera mba wang sha ishigh Nagh ga;

¹⁶man hire u nan ndôhôr ishima nan hôngor kpaa, or u ka nan ma ifer er ka mngerem nahan la!

¹⁷Ver ato me tese u; kwagh u m nenge a mi yô, ka un me pase u ye;

¹⁸kwagh u mbafankwagh ve pase gbar gbar, hii sha uter vev je, ve yer un ga;

¹⁹ka ve tseegh i ne ve tar la ye, ma orvannya lu a kar ve her atô ga.

²⁰Iferor ka nan ya ican ayange a nan cii, een, anyom a i ver a sha ci u ipilaor la cii.

²¹I ov i tan mciem ngi nan ker ato; sha ayange a nan lu yagh yagh la, ortimin ka a va bul nan;

²²nan na jighjigh er nana due ken ime ga, man sanker kpaa ngu keghen a kegh nan.

²³Ka nan zenden wue wue nan keren kwaghyan, nan kaan er: Ka han a lu? Shi nan fa er iyange i imegh i zurum a nan kpaa.

²⁴Ishimanyian kua zayol ve ta nan mciem iyol, ve hemba nan er tor u a kohol iyol i utya yô,

²⁵gadia nan naregh uwegh sha Aôndo sha ihom, nan cihi Uhembanagee;

²⁶nan nômbo ikôr nan za ta sha a Na, a igundu i akuvautya u nan.

²⁷Gadia nan wa ahôm sha ishi, man nan haa adivir iwenge;

²⁸shi nan tema ken agar a a hingir atse, ayou a ma or ma nan tem ker ga, a i ver a er a̱ lu atse yô.

²⁹Nana lu ornyar ga, man akaa a nan kpaa aa lu gbem ga; akaa a nan aa gba kwagh shin tar ga.

³⁰Nana due ken ime ga; nomborusu ua uma agbaa a nan, nana kar kera sha iôôn i ken zwa u nan.

³¹Nana̱ de kera suur sha kwagh u gbilinigh er nana tsugh iyol i nan ga; gadia gbilinkwagh una hingir injar i nan.

³²Á tôndo nan er shighe u nan a lu a kuma ga la je, ndaregh ku nan kpaa kua lu ndor ga.

³³Nana ndoor atam a nan kôgh er kon u wain nahan, nana ndoor ikparen u nan er kon u olev yô.

³⁴Gadia ikumior i mbaaferev ia saa ikôm, usu ua hia utenti mba mbayaningyato.

³⁵Ka ve jile iyol sha dang, ve mar ifer, iyav vev mbu mar icugh.