Read tiv Yobu 16 Bible Online

Yobu 16 - tiv bible

Yobu 16

¹Tsô Yobu gema kaa er:

²M vande ungwan imbaakaa ne kpishi; ne cii, ne mba mbasurunshima mba injaav ga.

³Akaaôron a sha ahumbe nga a mkur kpa? Shin ka nyi je i tor u ityô u kaan imo?

⁴Mo kpaa ma m fetyô u ôron kwagh er ne nahan, aluer uma wen una lu sha ian i uma wam yô; ma m fetyô u maghen akaaôron sha a ven, ma m jingi ityough sha a ven.

⁵Ma m taver ne sha zwa wam je, ishimasurun i sha zwa wam kpaa ma i pever ne asema.

⁶Shin mea ôr kwagh kpaa, ishimavihim yam ia pever ga; shin mea wa ishima yô, ka nyi je i pandema?

⁷Kpa hegen yô, A bee agee am cii; U tim ya wam cii kera.

⁸U kôrom taveraa — gema hingir ipasen i nan mo ibo; angev av mough num a mo mbu nan mo ibo ken igbar je.

⁹Iyugh Na andem, i ta num sha a mo; A nyuma tsombo a mo; orihom wam bon ashe sha a mo.

¹⁰Ve aver zwa ve sha a mo; ve; tam sambe sha henge sha ilyahan; ve kohol sha a mo a ishima i môm.

¹¹Aôndo nam sha ikev i mbamimiga, A gbihim sha ikev i mbaaferev.

¹²M tema bem bem, kpa A sombom; A tam uwegh ikôr, A sombom vughô vughô; A timim sha, m hingir ishor i keren.

¹³A vaan a Na kasem yisa; A pav ahi am, A zungwe mhôônom ga; A haa mlem am inya.

¹⁴A pevem ahura bever bever; A va ta sha a mo er ikôror yô.

¹⁵M kor ibashôhô m haa iyol, m kuma korough agh inya.

¹⁶Ishigh yagh hingir nyian sha mlia, akurashee am kpaa, mure u kuugh gba sha mi,

¹⁷shin er ma kwagh u aperagh a lu sha ave am ga nahan kpaa, man msen wam kpaa a lu wang yô.

¹⁸We tar, de cirin awambe am ga, mliam am ma de zough a ijiir i memen ga!

¹⁹Hegen je kpaa, nenge, shiada wam ngu Sha, Un u wasen mo la ngu Sha.

²⁰Akar a am nga nahan mo tar; ishe yam ngi vaan a Aôndo,

²¹sha u A̱ zamber Aôndo sha ci u or, er wan u or ka nan zamber sha ci u or u nan we ndor a nan yô!

²²Gadia anyom shi kpuaa tsô, me za gbenda u me kera hide ga yô.