Read tiv Yobu 17 Bible Online

Yobu 17 - tiv bible

Yobu 17

¹Jijingi wam vôr, ayange am kpaa bee ve, ka uwar tsô u mase keghen mo ye.

²Mimi je, tarnahan ngu a mo, ishe yam ngi nengen sha mbam ve la.

³Na ase ibumun hegen, va lum ishuur hen a We iyol You; ka anti ugen nana lum ishuuruu?

⁴Gadia U cir ve mkav u ken ishima; ka nahan man Ú na ve mhembe ga ye.

⁵Or u nan pase kwagh u akar a nan, nan ne a ibo sha u zuan a kwagh yô, ashe a ônov mba nan kpaa, aa hungwa ikôr.

⁶A geman m hingir ior kwagh u veren ishor a mi; m hingir or u i hee nan azer sha ishi yô.

⁷Ishe hingir mo cing sha ci u ishimavihin; alegh a iyolough am cii, nga er mure nahan.

⁸Kpiligh ior mbamimi iyol sha kwagh ne, mbaishôôv mba moughon num a mba ve we Aôndo iko ga yô.

⁹Kpa orperapera nana taver ishima sha gbenda u nan, u nan lu ave wang kpaa, nana seer taver a taver.

¹⁰Kpa ne cii, hide, shi va nen tsô; gadia m zua a ma orfankwagh ken a ven ga.

¹¹Ayange am bee mbaawashima av kpaa saa ishe, ka akaa a m ver ishima sha mi je la.

¹²Ve gema tugh hingir atetan; iwanger kpaa ngi ve ikua ikua a ime.

¹³Aluer m ver ishima shin Sheol mer, ka ya wam yô, man m tar gambe wam ken ime,

¹⁴m kaa a mhee mer: U ngu terem; man a ijôô di mer: Ngôm man anngôm u kwase;

¹⁵nahan ishimaverenkeghen yam shi ngi hana? Ishimaverenkeghen yam la, ka anti nana nenge a mini?

¹⁶Ia sen shin uishindan mba sheol, zum la mmem una lu shin vuulevu.