Read tiv Yobu 2 Bible Online

Yobu 2 - tiv bible

Yobu 2

¹Shi iyange igen ônov mba Aôndo va, va tile sha ishigh ki TER, Satan di kpaa shi va a ve imôngo va tile sha ishigh ki TER.

²Tsô TER pine Satan er: U due hana? Satan gema kaa a TER er: Ka ken ijende wue wue shin tar, u kôndon man u senen shin u.

³Nahan TER pine Satan er: U fa kwagh u wanakiriki Wam Yobu dedoo kpa? Gadia ma or kuma sha a na shin tar ga, ka or u mimi, u perapera, u cian Aôndo, palegh kwaghbo; man shi a kusu mimi na taveraa shin er u va vemben Mo wer, M̱ kôr un ihom, M̱ tim un sha ityôikaa ga, nahan kpaa.

⁴Satan gema kaa a TER er: Kwavyolough sha kwavyolough; mimi je, hanma kwagh u or nan lu a mi cii; nana na sha ci u uma u nan.

⁵Naregh ase uwegh Ough, bende ikuhe na kua inyam na, tsô una venda U sha ishigh You je.

⁶Tsô TER kaa a Satan er: Nenge, ngu sha ikev you; kpa ka di uma na tsô de ye.

⁷Tsô Satan kar sha ishigh ki TER kera, va haa Yobu avav a nyoon, hii shin akevangahar a na je, ar sha ihaghtyo na.

⁸Nahan a tôô agbatsenge, a gba a-an iyol a mi; a shar hen mtwe.

⁹Tsô kwase na kaa a na er: Nahan kpaa shi u kusu mimi wou hereghe? Venda Aôndo, yô, kpe kera.

¹⁰Kpa a gema a kaa a na er: U ngu ôron kwagh er ibumekwase nahan. Sé ngohol kwagh u dedoo hen Aôndo, man kwaghbo yô, sé kera ngohol gaa? Ken akaa ne cii Yobu er kwaghbo sha kwaghôron na ga.

¹¹Zum u akar a Yobu atar ungwa atsan a a tser Yobu la cii yô, ve cii ve mough, hanmô hen ya u nan, ve va her a na; ka Elifasa Orteman, man Bildadi Orshuhi, man Sofar Ornaamati, ve ver iyange i vea va vaa un, vea sur un ishima yô.

¹²Kpa er ve ta ashe ve za nenge a na ken ica je, man ve kav un ga yô, ve gba vaan genger genger; tsô hanmô ve ande riga u nan, ve tsenda inya sha, i va haa ve sha ityou.

¹³Nahan ve shar inya a na imôngo kuma ayange ataankarahar kua aime di ataankarahar, mô ôr kwagh a na ga, gadia ve kav er ican la i kehe yum yô.