Read tiv Yobu 27 Bible Online

Yobu 27 - tiv bible

Yobu 27

¹Tsô Yobu shi tôô injakwagh na, gba ôron er:

²Mimi je, er Aôndo A lu u uma, u A ngohol mo mimi kera, man Uhembanagee, u A er uma wam ican yum ne,

³er uma wam hira ngu ker a mo doo doo ne, man iôôn i Aôndo kpaa ngim ken ahenga,

⁴zwa wam ua ôr kwagh u ifer ga, man nombor wam kpaa ua ôr kwagh u icughugh ga.

⁵Mayange me na ishô sha won ga, zan zan me kpe je kpaa, me gbihi mimi wam ga.

⁶Me kusu perapera wam, me gbihi un ga, ayange a uma wam cii, ishima ngi nan mo ibo sha imô mayange ga.

⁷Orihom wam a̱ hingir er iferor nahan, man or u moughon num a mo nana̱ hingir er u nan lu a mimi ga yô.

⁸Gadia ishimaverenkeghen i or u nan vende Aôndo la, ngi nana, zum u Aôndo Una tôndo nan kera, Una tsuwe uma u nan kera laa?

⁹Aôndo Una ungwa mliam ma nan zum u ican i tser nan laa?

¹⁰Nana zer ember ken Uhembanagee, shi nana yilan sha iti i Aôndo gbem gbem je kpa?

¹¹Me tese ne kwagh u sha uwegh ku Aôndo; kwagh u a lu hen Uhembanagee la, me yer un ga.

¹²Nenge, ne ayol a en cii ne nenge a mi; man inja na nan ne hingir dang nahana?

¹³Ngun ka ci u iferor nan ngohol hen Aôndo, kua dyako u uipirambaiorov ve ngohol hen Uhembanagee yô;

¹⁴Aluer ônov mba nan vea ngee kpaa, ka sha ci u hingir kwaghyan u sanker tsô; tsombor u nan kpaa, kwaghyan una kuma u ga.

¹⁵Asande a a shi nan her la kpaa, bouange una haa a shin uwar; man kasev mba côgholov mba nan kpaa, vea zungwe ku ga.

¹⁶Shin nana kohol azurfa er vuulevu nahan, man shi akondo er inyandor nahan kpaa,

¹⁷nana kohol a kpaa, kpa ka mbaperapera vea haa a ye, azurfa la kpaa, mbaishôôv vea kar kwar sha mi.

¹⁸Ka nan maa iyou i nan er adenger nahan, man er daar u or u kuran sule ka nan er la nahan.

¹⁹Nan za yav a inyaregh je, kpa nan kera mough ga; nan bugh ashe a nan, ma kwagh kpaa a kera lu ga.

²⁰Mciem ma haa nan iyol er ikuwanmnger nahan; uraahumbe va kuwa a nan tugh.

²¹Ahumbe a sha ityoughkitaregh a va tera nan kera, a kar a nan sha ijiir i nan kera.

²²Gadia Aôndo Una ta nan kwagh, Una zungwe mhôônom ga, nana nôngo u waren uwegh Nagh fese.

²³Ior vea kure nan ave, vea hure nan hen ijiir i nan kera.