Read tiv Yobu 3 Bible Online

Yobu 3 - tiv bible

Yobu 3

¹Ken masetyô u kwagh ne yô, Yobu bugh zwa na wa iyange na ifan.

³Iyange i i marem la, i̱ saa ishe; kua tugh mbu mbu kaa er: I mar wannomso, la.

⁴Iyange la, i̱ hingir ime; Aôndo A̱ de we i iko Sha ga, iwanger kpaa, i̱ de te sha i ga.

⁵Ime man mure u kuugh ve̱ kôr i i̱ hingir kwagh ve je; abeen a̱ cir i; hanma kwagh u a ne iyange i we ime yô, a̱ ta i mciem iyol.

⁶Tugh mbula yô, angôghime a̱ kôr mbu; mbu̱ de lu saan saan ken ayange a inyom ga; mbu̱ de nyer ken iyenge i iweregh kpaa ga.

⁷Een, tugh mbula mbu̱ de lu a kwagh ga; iember kpaa i̱ de kera nyer ken mbu ga.

⁸Mba ve we iyange ifan la, ve̱ wa mbu ifan; ka mba ve fe u nomon gumgum je la.

⁹Asan a mbu a sha use la, a̱ wa ime; mbu̱ kegh iwanger, kpa mbu̱ de zough a mi ga; man shi mbu̱ de nengen akurashee a sha use la ga;

¹⁰gadia mbu wuhe ihinda i iyav mbu ngôm ga, mbu yer ashe am a ican kpaa ga.

¹¹Ka nyi man m kpe shighe u i marem la ga ase? man m saa zum u m due ken uya la ga nahana?

¹²Ka nyi man anu ngohol mo? man atumba kpaa, er m̱ amba?

¹³Nahan ma m yav inya, ma m huan kpaa, ma m gbe mnyam, ma m mem,

¹⁴a utor man mbaajiriv mba tarev imôngo, mba ve shi ve maa ajiir a i yôhôl a kera la her, sha ci ve ayol a ve;

¹⁵shin a atiator a a lu a zenaria, a a iv uya vev a azurfa;

¹⁶shin ma m lu er iyav mbu dughun mbu mbu lu myer nahan, ma m lu ga, er anikundanev mba ve nenge a iwanger mayange je ga yô.

¹⁷Keela yô, mbaaferev ve kera kumbur ga, keela kpaa mbavôron mba memen.

¹⁸Keela yô, mbakwarev mba memen imôngo, mba ongo imo i or u torough a ve ga.

¹⁹Mbakiriki kua mbatamen mba her; ortom kpaa nan kera ngu sha ikev i orvesen u nan ga.

²⁰Ka nyi A ne or u nan lu ken ican la iwanger, man mba asema a vihi ve tsung la uma kpaa?

²¹mba ku u sar ve, kpa u va ga, mba ve time, ve ker u, hemba inyaregh ki ken myer;

²²mba ma ve ember tsung, ma ve lu saan saan aluer vea fatyô u zuan a uwar yô.

²³Er nan man A ne or u gbenda u nan u lu myer la, iwanger, u Aôndo A we nan igyar, A kase nana?

²⁴Gadia ishimashirin i vem er ka kwaghyan wam yô, mbamtoghor av kpaa mba hee er mngerem yô,

²⁵gadia kwagh u m cie un la, gem te sha a mo, man kwagh u a nem mciem ken ishima yô, gem tseren mo.

²⁶Yôhôl mo iyol ga, m zua a bem ga, mmem kpaa m ngu a mi ga, ka ican tsô, i tseren mo ye.