Read tiv Yobu 31 Bible Online

Yobu 31 - tiv bible

Yobu 31

¹M ya ikur a ashe am; nahan á er nan man me kenger sha iniunkwasa?

²Gadia ka hanma kwar á zua a mi hen Aôndo Sha; man ka hanma dyako á zua a mi hen Uhembanagee sha ajiir a Sha?

³Ka mtim sha ci u or u nan ban a perapera man bocan sha ci u mbaerenafer gaa?

⁴Un A nenge igbenda yam man A ôr iyenge i a-avenangahar am cii kpaa gaa?

⁵Aluer mea zenden sha atseregh, man angahar a am kpaa aa zaan fefa sha icugh yô,

⁶A̱ karem ase sha ikaren i mimi, sha er Aôndo A̱ fa mimi wam yô!

⁷Aluer mea kaha gbenda, man ishima yam ia zaan sha isharen i ashe am, man ma acôghol kpaa aa luun mo sha ave yô,

⁸yô, de, m̱ lôô, orgen nana̱ ya, iyiagh ki ken sule wam kpaa, i̱ wuhe ki kera.

⁹Aluer ishima yam ia nzughul sha isharen i kwase, man mea lian hen hunda u or u nan we ndor a mo yô,

¹⁰i̱ de, kwase wam a̱ wua orgen uwua, mbagenev kpaa ve̱ gure sha a na.

¹¹Gadia kwagh shon ka kwaghbo u dang je; een, ka kwaghbo u a kom mtsaha sha ikev i mbaajiriv je la.

¹²Gadia ka usu u hian zan zan aren ken mtim je, u ua vihim akaa am a m zough a mi cii kera.

¹³Aluer mea laha ityôkwagh i kpan wam u nomso shin kpan wam u kwase, zum u vea gba ayôôso a mo sha kwagh yô,

¹⁴nahan me er nan je aluer Aôndo Una mough sha? Aluer Una va pinem yô, me kaa Un mer nyi?

¹⁵Wen u A erem ken uya, ka Un A er ngula kpaa ye gaa? Ka Un môm A er se cii ken uya ye gaa?

¹⁶Aluer mea nyumen mbaatsanev kwagh u a sar ve, shin mea er kwasecôghol nana̱ hungwa ashe ikôr kpaa,

¹⁷shin mea yaan anruam wam mo tswen, ancôghol nana zuan a anivur ga yô—

¹⁸gadia er m lu iyev je a vese hen a mo er ka hen ter na yô, m hemen un gbenda hii ken iyav mbu ngôm je—

¹⁹aluer mea nenge ma or nana lu saan ishe sha mban u akondo, shin mbaibanave, vea lu a kwagh u cirin iyol ga;

²⁰aluer iwenge na ia wuese mo ga, man aluer a tsee un iyol sha ul u iyôngo yam kpaa ga yô;

²¹aluer mea naregh uwegh sha u nzughul a ancôghol, sha ci u m nenge a iwasen yam sha hundagar yô,

²²de, vandegh ku̱ tôndom sha kpaakpawe kera, uwegh agh kpaa ku̱ sombo sha kuhe kera.

²³Gadia mtim u sha ikev i Aôndo kam kwagh u cieryol, icivir Na i hemban la, erem, m kera fatyô u eren ma kwagh ga.

²⁴Aluer mea veren ishima yam sha zenaria, man mea kaan a zenaria u wang mer: We u ngum kwagh u suur sha mi yô;

²⁵aluer mea ember sha er m ngee a inyaregh, man sha ci u uwegh agh ku zough a kwagh kpishi kpaa yô;

²⁶aluer mea kenger sha iyange er i te la, shin uwer u u lu tan wanger wanger la,

²⁷zan zan i mee ishima yam ken myer, man zwa wam ua suse uwegh agh, kua tese sha a ve yô,

²⁸ngun kpaa, ka kwaghbo u a kom mtsaha sha ikev i mbaajiriv je; gadia mea er nahan tsô kpaa, m nyiman Aôndo u Sha je ve.

²⁹Aluer mea ember sha kwaghbo u a tser or u nan kerem ihom, man mea timin akende zum u ican i tser nan kpaa—

³⁰mimi je, m rumun zwa wam u er kwaghbo u wa nan ifan er nana̱ saa ga—

³¹aluer ior mba hen tenti wam vea kaa nahan ga yô, er: Or u nan idi sha iweryôron na i sha inyam ga yô, nan ngu je kpa?—

³²Orvannya tsa hen gbenda mayange ga, m bughun orzende ihinda yam—

³³Aluer mea cirin akaabo am er Adam nahan, mea yeren ifer yam ken vanger kpaa yô,

³⁴sha ci u m cia ikpelaior, man ilyahan i icombor i ior i tan mo mciem iyol, je, m huan ving, sha hunda tsô kpaa m due ga yô.

³⁵Kpei, ma m shi lu a or u ungwan mo!— Nenge, ikav i m we i sha uwegh agh ngin, Uhembanagee, A̱ kaa imo!— Ma m shi ongo msende u orihom wam a nger sha a mo yô!

³⁶Ma m tee un sha avande am kpee je, ma m kange un sha ityough yagh er tsar nahan,

³⁷ma m pase Un kwagh u a-aven am cii, ma m ve sha ishigh Nagh er wantor yô.

³⁸Aluer sule wam ua yilam ijir, man ihigha i u cii ia vaa yô,

³⁹aluer mea yaan iyiagh ki u, mea kimbin ga, mea er uma u mbasulev a saa ishe kpaa yô,

⁴⁰de, usaa ve̱ mende sha ityough ki alakema, man toho u̱ mende sha ityough ki shair. Kwaghôron u Yobu kure ve.