Read tiv Upasalmi 102 Bible Online

Upasalmi 102 - tiv bible

Upasalmi 102

¹TERE, ungwa msen wam, mliam am ma ma nyer her a We.

²De yeren mo ishigh You sha iyange i mzeyol wam la ga; ver ato her a mo, sha iyange i me yila yô, rumun mo fese;

³gadia ayange am nga saan kera er mnyim nahan, akuhe am hia er kwagh u usu u ker sha min yô;

⁴i cagh ishima yam er toho nahan i use je; gadia kwaghyan kpaa hungul mo u yan.

⁵Sha mtoghor wam yum la, akuhe am var sha inyam yam,

⁶m hingir er akumedu u ken desereti nahan, man shi m hingir er ivungu i hen atse a iyoughough nahan.

⁷Ka m tsa per, m hingir er inyon i i tem sha tor tswen dang yô.

⁸Mbaihomov av ka ve shi heen mo iyange jimin cii; mba asema a vihi ve a mo tsung la, mba geman iti yam hingir kwagh u wan ifan a mi.

⁹Gadia m ya mtwem er ka ruam yô, m nungwa mliam sha kwaghman wam,

¹⁰sha ci u ishima i vihin You man iyugh You la, gadia U tôôm, U ta kera.

¹¹Ayange am nga er mure u a gbe a ze ca yô; m use er toho nahan.

¹²Kpa We yô, TERE, U ngu gbem sha won, á umbur iti You sha ikov ikov.

¹³Ú mough, Ú zungwe Shion mhôônom; gadia shighe u zungwen un mhôônom kuma ve, shighe u i vande veren la kuma ve.

¹⁴Gadia doo mbayev Ou a awen a na, man mhôônom kôr ve a alôgh a ayou a na la.

¹⁵Nahan akuraior aa cia iti i TER, utor mba sha won cii kpaa, vea cia iengem You.

¹⁶Gadia TER maa Shion, A ande a iengem Na,

¹⁷A ungwa msen u mba ve lu a orjime ga yô, A laha msen ve je ga.

¹⁸Á nger kwagh ne sha ci u kov u ua va la, man ikurior i á va gba i la, ia wuese TER.

¹⁹Gadia A tema sha icighanjiir Na u sha, A shir ashe shin, TER tema Sha, gema nenge tar shin,

²⁰sha u Una ungwa ishimashirin i orkwar, man sha u Una pase á tuhwa mba i we ve ken ku yô;

²¹sha er ior ve̱ yôô iti i TER ken Shion yô, man iwuese Na ken Yerusalem,

²²zum u ior cii kua akuraior, vea kohol ijiir i môm sha u civir TER la yô.

²³A vihim agee sha gbenda, A nyuram a ayange kpaa.

²⁴M kaa mer: Ku! Aôndo wam, de kera tôôn mo kera er m lu hen atô u ayange am ne ga; anyom a Ou nga sha ikov ikov.

²⁵U tim imagh ki taregh hiihii je, Usha kpaa ka tom u sha ave Ou.

²⁶Ve vea saa ishe, kpa We yô, Ú tsôr sha won, ve cii vea bee iyol er riga ka a bee nahan, man U musan ve er ka ikondo nahan, vea kar kera.

²⁷Kpa We yô, Ú lu di her nahan; anyom a Ou kpaa nga a mkur ga.

²⁸Ônov mba mbayev Ou kpaa vea lu her, man tsombor ve kpaa ua lu sha ishigh You gbem. Ka Pasalmi u Davidi