Read tiv Upasalmi 103 Bible Online

Upasalmi 103 - tiv bible

Upasalmi 103

¹Wuese TER, we uma wam; kwagh u a lu ken mo cii kpaa, a̱ wuese icighanti Na.

²Wuese TER, we uma wam, ma kwagh môm ken aeren a Na a doon la cii, a̱ de hungul we ga;

³u A de u aferakaa a ou cii, A bee u angev ou cii,

⁴A dugh uma wou ken mtim kera; A kange u tsar u erdoo man mhôônom ma kôron sha ityou,

⁵A iv uma wou a akaadedoo, je iyev ou hingir hegh er mbu iguve nahan.

⁶TER eren akaa a perapera, man shi er ijir i mimi sha ci u mba i kighir ve a ican yô.

⁷A pase Mose igbenda Na, man aeren a Na hen ônov mba Iserael.

⁸TER mgbough a mhôônom ma zungwen kua mrumun u sha mhôôn, we ishima, erdoo Na ngee wuee;

⁹zehe gbem ga, ishima i nyoon Un gbem kpaa ga.

¹⁰A or se iyev sha asorabo ase ga, A na se injar i sha aferakaa ase la kpaa ga.

¹¹Gadia er Sha a gbe ca a kar tar sha nahan, kape erdoo Na kpaa a kehe a mba ve cie Un la.

¹²Er ica i ityoughkitaregh a ityôtar nahan, kape ngu A pav akaabo ase a vese la;

¹³er mhôônom ka ma kôr ter a ônov nahan, kape TER kpaa mhôônom ma ker Un a mba ve cie Un la.

¹⁴Gadia Un yô, A fa mlu wase, A umbur er se lu vuulevu je yô.

¹⁵Or yô, ayange a nan nga er toho yô; ka nan gbaa hômon er imondon u ken toho yô,

¹⁶zum u ahumbe a te sha mi la, a kar kera; ijiir na tsô kpaa i kera fa un ga.

¹⁷Kpa erdoo u TER yô, ngu sha mba ve cie Un hii sha uicôronmbaashighev zan zan gbem sha won; perapera Na kpaa ngu zan zan sha ônov mba ônov je,

¹⁸sha mba ve kor ikuryan Na, man mba ve umbur atindi Na, ve eren sha mi kpaa yô.

¹⁹TER ver ikônough Nagh ki torough dong sha Usha, tartor Na kpaa ngu sha won cii.

²⁰Wuese nen TER, ne mbatyomov Nav, ne mbaageev, mba ne eren sha imo Na, er ne we imo i kwaghôron Na iko yô.

²¹Wuese nen TER, ne akum a Na a Sha cii, ne mbatomov Nav, mba ne eren sha ishima Na yô.

²²Wuese nen TER, ne ityom Na cii, ken ajiir a A tem tor la cii. Wuese TER, we uma wam.