Read tiv Upasalmi 107 Bible Online

Upasalmi 107 - tiv bible

Upasalmi 107

¹Wuese nen TER, gadia A doo; gadia erdoo Na ka u tsôron gbem sha won je.

²Mba TER A paa ve yô, ve̱ kaa nahan, mba A paa ve sha ikev i ican la,

³mba A kohol ve ken ityar kposo kposo, A hidi a ve yô, sha ityoughkitaregh man shin ityôtar, man shi ken imbusutarimese man iyan.

⁴Mbagenev zende wue wue ken desereti, gbenda kpaa lu ga, ve zua a gar u teman ker ga;

⁵ijen man imura kôr ve, vôr ve iyol;

⁶nahan ken ican ve la je, ve genger amo ve vaa a TER, Un kpaa A yima ve ken atsan a a tser ve la.

⁷A hemen ve sha gbenda u jighilii, sha er vea za ken gar u vea za tema ker yô.

⁸Yô, ve̱ wuese TER sha erdoo Na, man aeren a Na a kpilighyol, a A eren a ônov mba iorov yô.

⁹Gadia ka A bee or imura i i ker nan la; man shi or u ijen i ker nan kpaa, ka A iv nan a kwagh u doon.

¹⁰Mbagenev tema ken ime man mure u kuugh, i kange ve sha ican man sha iyô,

¹¹sha ci u ve hendan a akaaôron a Aôndo, man ve laha kwaghwan u Uhembansha yô;

¹²ka nahan man A shirigh a asema a ve inya sha tom u ican, ve nôngo gbev ve gba, orwasen môm nan lu ga ye.

¹³Nahan ken ican ve la je, ve genger amo ve vaa a TER, Un kpaa A yima ve ken atsan a a tser ve la.

¹⁴A due a ve ken ime man mure u kuugh, A tôndo ikangenev vev kera.

¹⁵Yô, ve̱ wuese TER sha erdoo Na, man aeren a Na a kpilighyol, a A eren a ônov mba iorov yô.

¹⁶Gadia A hembe ihinda i togula, man A tôndo uishindan mba iyôô kera.

¹⁷Mbagenev lu abumeaior; sha akaabo a ve man aferakaa a ve yô, ve lu yan ican tsung;

¹⁸hanma injakwaghyan cii, ndôhôr ve ishima, ve mgbôghom a ihinda i kuugh.

¹⁹Nahan ken ican ve la je, ve genger amo ve vaa a TER, Un kpaa A yima ve ken atsan a a tser ve la.

²⁰A tindi mkaanem Nam, A bee ve angev, a due a ve ken mtim kera.

²¹Yô, ve̱ wuese TER sha erdoo Na, man aeren a Na a kpilighyol, a A eren a ônov mba iorov yô.

²²Ve̱ na iniav mbi sha ishughun, man ve̱ pase ityom Na sha atsam a ember.

²³Mbagenev sen shin zegemnger ken utso, ve yamen kasua ken mngerem ma tamen;

²⁴ve nenge a ityom i TER, man aeren a Na a kpilighyol shin iv.

²⁵Gadia A ôr kwagh, zegeahumbe mough, u a er agôndo a zegemnger mough;

²⁶ve kôndo ve mande sha kwavaôndo, shi ve hide ve sen shin iv; kondo ve iyol sha ican i i tser ve la.

²⁷Ve hingir ze ze ze, zemba ze zemba, er or u nan hundu msôrom yô; kwaghfan ve bee ca ca.

²⁸Nahan ken ican ve la je, ve genger amo ve vaa a TER, Un kpaa A dugh a ve ken atsan a a tser ve la.

²⁹A yange uraahumbe, u huan ving, man agôndoamnger kpaa a de,

³⁰nahan saan ve iyol er a hingir ving yô; tsô A za ar a ve hen ihongo i ve ver ishima u zan la.

³¹Yô, ve̱ wuese TER sha erdoo Na, man aeren a Na a kpilighyol a A eren a ônov mba iorov yô.

³²Ve̱ kende Un sha ken mkohol u ior, ve̱ wuese Un hen ajiir a mbatamen ve tem idyu la.

³³Ka A gema uifi ve hingir udeserti, man amboramnger kpaa, a hingir tar u imuragh;

³⁴inya i dedoo, i hingir inyabar, sha ci u ifer i mba ve tem ker la.

³⁵Ka A gema desereti, a hingir ber u mnger, man tar u tseghe tseghe kpaa, u hingir amboramnger.

³⁶A ver mbagenev er ve̱ tema ker; ve̱ maa gar, ve̱ tema ker,

³⁷ve̱ kaha ishule i uyia, ve̱ môôr ikon i wain kpaa, iyiav ngee ker kpishi.

³⁸A ver ve doo doo kpaa, zan zan ve seer ngeen a ngee; A rumun er ilev vev mbi̱ pande a pande ga.

³⁹Kpa shi iyenge ve pande, ve var inya, sha mkighir man ican i tseren ve kua mzungu kpaa.

⁴⁰Ka A hee ashagbaior, A na ve, ve zende wue wue ken taaikôngo henpe gbenda lu ga yô.

⁴¹Ka A dugh oribanave ken ican, A kende a nan sha, A gema icombor i nan i hingir er ikumuile yô.

⁴²Mbaperapera mba nengen kwagh la, nahan saan ve iyol; iferkwagh cii kusu zwa u i.

⁴³Or u nan lu a kwaghfan yô, nana̱ ver ishima sha akaa ne, ve̱ ver ishima sha uerdoo mba TER kpaa. Ka icam. Ka Pasalmi u Davidi