Read tiv Upasalmi 112 Bible Online

Upasalmi 112 - tiv bible

Upasalmi 112

¹Haleluya. Saan or u nan cie TER la iyol, man atindi a Na a doo nan ishima tsung la.

²Tsombor u nan ua hingir u ageegh sha won; kov u mbaperapera yô, á ver u doo doo.

³Mngee u akaa man inyaregh ki kpishigh vea lu hen ya u nan; perapera u nan kpaa una lu gbem sha won je.

⁴Iwanger due kôndo sha ken ime sha ci u mba ve lu a mimi yô, a mrumun u sha mhôôn man mhôônom ma zungwen man perapera kpaa.

⁵Kpe or u mhôônom ma ker nan la iyol, nan pwaren nan ne la, u nan eren akaa a nan sha mimi yô,

⁶gadia nana tenger mayange ga; or u perapera yô, á umbur nan gbem.

⁷Nana cia loho u bo ga, ishima i nan i taver sha er nan suur sha TER yô.

⁸Ishima i nan i taver, nana cia kwagh ga, zan zan nana kar nengen a awashima u nan sha mbaahendanev mba nan la;

⁹nan sar, nan na mbaibanave; perapera u nan una lu gbem sha won je; á kende korough ku nan sha, sha icivir.

¹⁰Iferor nan nenge, vihi nan, nan yan anyi nan sough kera; isharen i iferor ia saa ishe.