Read tiv Upasalmi 115 Bible Online

Upasalmi 115 - tiv bible

Upasalmi 115

¹Ka se ga, ka se ga, TERE, kpa ka iti You á na i icivir, sha ci u erdoo Wou man mimi Wou ye.

²Ka nyi man atôatyev aa pine er: Aôndo ve yô, ngu han ase?

³Aôndo wase yô, ngu Sha, ka A er hanma kwagh u i doo Un u eren yô.

⁴Ieev vev ka azurfa man zenaria, tom u sha ave a ior.

⁵Mbi a ijô, kpa mbi er kwagh ga; mbi a ashe, kpa mbi nengen ga;

⁶mbi a ato, kpa mbi ongo ga; mbi a ahenga, kpa mbi ongo ihuma ga;

⁷mbi a ave, kpa mbi peven sha kwagh ga; mbi a angahar, kpa mbi zenden ga; imo kpaa ngi dugh ken gôngor u mbi ga.

⁸Mba ve gbe mbi la vea hingir er mbi nahan, hanmô u nan suur sha mbi yô.

⁹We, Iserael, suur sha TER; ka Un A lu iwasen ve man perutya ve kpaa ye.

¹⁰We, ya u Aron, suur sha TER; ka Un A lu iwasen ve, man perutya ve kpaa ye.

¹¹Ne mba ne cie TER yô, suur nen sha TER; ka Un A lu iwasen ve, man perutya ve kpaa ye.

¹²TER umbur se, Una na iveren; Una ver ya u Iserael doo doo; Una ver ya u Aron doo doo;

¹³Una ver mba ve cie TER doo doo, mbakiriki kua mbavesen cii.

¹⁴TER A̱ seer ne er ne̱ ngee, ne̱ za a za hemen yô, ne kua ônov enev cii.

¹⁵TER A̱ ver ne doo doo, Un u A gbe sha man tar la.

¹⁶Usha ka usha mba TER, kpa tar yô, A na ônov mba iorov.

¹⁷Mbakpenev mba wuese TER ga, mô môm u senen shin ijiir i ving kpaa ga.

¹⁸Kpa se yô, sé wuese TER, hii hegen je zan zan gbem sha won. Haleluya.