Read tiv Upasalmi 116 Bible Online

Upasalmi 116 - tiv bible

Upasalmi 116

¹TER doom ishima sha ci u A ongo imo yam man uzamber av yô.

²Er A ver ato hen a mo yô, nahan me yila Un sha ayange a m lu uma yô.

³Ikor i kuugh kasem, mcieryol u Sheol tserem, m zua a ican man mzungu.

⁴Nahan m yila iti i TER mer: TERE, ma U shi yem uma wama!

⁵TER ngu a mrumun u sha mhôôn man perapera kpaa, Aôndo wase zungu mhôônom.

⁶TER kor mbalanenkwagh; m lu seelee, kpa A yimam.

⁷Hile hen mmem wou, uma wam, gadia TER er a we dedoo yum.

⁸Gadia U yima uma wam ken ku, ashe am sha mlia, angahar am kpaa, sha mgbe.

⁹Me zende sha ishigh ki TER, ken tar u mbaumav.

¹⁰M na jighjigh, zum u m ôr mer: Ican erem tsung la.

¹¹Er kondom iyol yô, m kaa mer: Ior cii ka mbaaiev.

¹²Ka nyi me na TER sha ci u akaa a Na a dedoo a A erem cii laa?

¹³Me ngohol iyongo i myom, me yila sha iti i TER.

¹⁴Me kure uiceghzwa av a TER sha ishigh ki ior Nav cii.

¹⁵Sha ishigh ki TER yô, ku u uicighan Nav ka kwagh u injaa kpishi.

¹⁶TERE, mimi je, m ngu wanakiriki Wou; m ngu wanakiriki Wou, wan u wanye Wou u kwase; U sagh ikangenev yav.

¹⁷Me na U nagh ku ishughun, me yila sha iti i TER.

¹⁸Me kure uiceghzwa av a TER, sha ishigh ki ior Nav cii,

¹⁹ken ityembe i sha ishigh ki iyou i TER, hen atô wou, we Yerusalem. Haleluya.