Read tiv Upasalmi 135 Bible Online

Upasalmi 135 - tiv bible

Upasalmi 135

¹Haleluya. Wuese nen iti i TER; wuese nen ne mbayev mba TER,

²ne mba ne til ken iyou i TER, ken ityembe i sha ishigh ki iyou i Aôndo wase;

³wuese nen TER, gadia TER doo, wa nen atsam a wuese iti Na, gadia i doo kpishi.

⁴Gadia TER tsuwa Yakob sha ci Na iyol Na je, Iserael hingir kwagh Na jim.

⁵Gadia mo m fa er TER A hembe lun a icivir cii, man er Ter wase A hembe mbaaôndo mbagenev cii kpaa yô.

⁶TER eren hanma kwagh u a doo Un ishima yô, sha aôndo, man shin tar, man shin uzegembamngerev kua shin aiv kpaa.

⁷Ka A er tulugh a kôndo sha, sha akighir a tar je; man ka A er inyiar sha ci u ura; shi A due a ahumbe ken iuna Na kpaa.

⁸A wua ônovmbaiundav mba Igipiti, mba iorov kua mba uile kpaa.

⁹A tindi uivande man akaakpilighyol ken atô wou, we Igipiti, sha Farao kua sha mbayev nav cii.

¹⁰A hemba akuraior kpishi, shi A wua utor mba ageev kpaa;

¹¹Shihon, tor u Mbaamor, man Ogo, tor u Bashan, kua ityartor i Kanaan cii kpaa.

¹²A gema tar ve la, hingir dyako, dyako u Iserael ior Nav la.

¹³TERE, iti You yô, ka i tsôron gbem sha won; TERE, m-umbur u á umbur We kpaa, á lu sha ikov ikov.

¹⁴Gadia TER Una ôr ior Nav ijir sha mimi, mhôônom maa kôr Un a mbayev Nav.

¹⁵Ieev mbi atôatyev yô, ka azurfa man zenaria, tom u sha ave a ior.

¹⁶Mbi a ijô, kpa mbi er kwagh ga; mbi a ashe, kpa mbi nengen ga;

¹⁷mbi a ato, kpa mbi ongo ga; shin ma iôôn kpaa ngi ken ijô i mbi ga.

¹⁸Mba ve gbe mbi vea hingir er mbi nahan, hanmô u nan suur sha mbi yô.

¹⁹We, ya u Iserael wuese TER; we, ya u Aron, wuese TER;

²⁰we, ya u Levi, wuese TER; ne mba ne cie TER yô, wuese nen TER.

²¹I̱ wuese TER ken Shion, Un u A tem ken Yerusalem la! Haleluya.