Read tiv Upasalmi 144 Bible Online

Upasalmi 144 - tiv bible

Upasalmi 144

¹I̱ wuese TER, vande wam, u A tese ave am ityav mbi nôngon, man ahôaveegh am kpaa num u nôngon ne.

²Erdoo wam man iyouutya yam, gôgôyou wam, man Oryiman wam kpaa, perutya wam, man Un u m suur sha a Na, u A gem a ior av, ve hingir sha ikev yam yô.

³TERE, or ngu nyi man U fe nana? man wan u or kpaa, er U we nan iko yô?

⁴Or ngu er ka humbe nahan, ayange a nan nga er mure u a karen kera fefa nahan.

⁵Nerem a Usha Ou, TERE, hungwa shin inya, bende a iwo, i̱ due mnyim.

⁶Haa inyiar, sambe ve, ker avaan a Ou, nzughul a ve;

⁷naregh uwegh Ough Sha, va yimam, dughum ken uzegembamngerev, ken ikev i atôatyev la,

⁸mba zwa ve u er kwagh u aiegh, uwegh vegh ku yanegh kpaa ku lu uwegh ku yanegh ku icughugh yô.

⁹Me wa U icam i he, Aôndo; ka sha adiguve u ingyanyinya pue me wa atsam a wuese We ye,

¹⁰We u U ne utor mhembe, U yem wanakiriki Wou Davidi sha sanker u bo la.

¹¹Yimam, dughum sha ikev i atôatyev, mba zwa ve u er kwagh u aiegh, uwegh vegh ku yanegh kpaa ku lu uwegh ku yanegh ku icughugh yô.

¹²Ônov asev mba nomso, ve̱ hingir er agumaikon a a vese doo doo ken iyev vev je; ônov asev mba kasev kpaa, ve̱ lu er awen a sha zongo, a i koo a doo doo er ka sha ci u iyou i tor nahan;

¹³Iuna yase i̱ iv, i̱ iv a hanma iyiagh; ilev yasev kpaa mbi̱ mar udubu man udubu pue, mbi̱ ngee ken akôngo a ase;

¹⁴ibua yase kpaa, i̱ penda i ikav mbi vesen; i̱ de peven gilgar ga, mdugh kpaa i̱ de dugh ga, ivaa i gbidyen kpaa, i̱ de lu hen ityembe yase ga.

¹⁵Saan ior mba ve lu a imbamlu ne iyol je, een, saan ior mba TER A lu Aôndo ve la, iyol. Ka Pasalmi u iwuese, u Davidi