Read tiv Upasalmi 148 Bible Online

Upasalmi 148 - tiv bible

Upasalmi 148

¹Haleluya. Wuese nen TER, ne mba ne lu sha Usha shaala, wuese nen Un sha ajiir a a lu sha la.

²Wuese nen Un ne mbatyomov Nav mba Shaav cii, wuese nen Un ne akum a Na cii.

³Wuese nen Un, we iyange man uwer kpaa; wuese nen Un ne asan a tan iwanger cii.

⁴Wuese nen Un ne Usha mba ne hembe gban ca la cii, ne mngerem ma sha Usha kpaa.

⁵Ve̱ wuese iti i TER, gadia Un A kaa man i gba ve ye,

⁶A ver ve er ve̱ lu heregh gbem sha won, A wa tindi u mô ve môm una per ga yô.

⁷Wuese nen TER shin tar, ne ishôso i vesen i shin zegemnger kua aiv cii kpaa,

⁸usu man ura u awomboogh man senou man irkpiigh, man uraahumbe u u eren sha mkaanem Nam vough yô;

⁹iwo man agungu cii, ikon i umen atam kua usedar cii kpaa;

¹⁰inyamtoho man uzendenya cii, akaa a a kper a kpela inya man inyon i purugh cii kpaa;

¹¹utor mba tarev man akuraior cii kpaa, mbatarev man mbaajiriv mba shin tar cii kpaa;

¹²ikaior kua mbayevkasev, utsembaiorov man mbayev kpaa;

¹³ve̱ wuese iti i TER, gadia ka iti Na tseegh i kende i sha ye, iengem Na ngi sha, kar tar kua Sha kpaa.

¹⁴A kende a korough sha, sha ci u ior Nav, ka iwuese sha ci u mba i doo Un a ve la cii, ka ônov mba Iserael mba ve mgbôghom a na ikua je la. Haleluya.