Read tiv Upasalmi 22 Bible Online

Upasalmi 22 - tiv bible

Upasalmi 22

¹Aôndo wam, Aôndo wam, ka nyi U undumu? Ka nyi U gbe ca a mo sha u wasen mo, man sha akaaôron am a sha mtoghor nahana?

²Kpash! Aôndo wam, ka a lu atetan yô, m ngor ikenge, kpa U bugh zwa ga, a lu tugh kpaa m huan ga.

³Kpa We U ngu Icighan je, We u U tem ken atsam a wuese a Iserael.

⁴Uter asev lu suur sha a We; ve suur, nahan U yima ve je;

⁵ve vaa a We, man ve war ye; ve suur sha a We, ve va ahenge ga.

⁶Kpa mo m ngu anyigôô, m ngu or ga; m ngu kwagh u ndôhôrshima hen ior, m ngu kwagh u lahan hen ikurior ne.

⁷Mba ve nengen a mo cii, ve sem sha mlaha; ve nur zwa, ve jingir ityough, ve kaa er:

⁸A wa iyol na sha ikev i TER; yô, A̱ yima un! A̱ war un, gadia i doo Un a na.

⁹Kpa ka We je, lu U due a mo ken uya ye, U na, m suur je, er m lu man atumba yô.

¹⁰Er i marem la je, i gemam i na U; er m lu ngôm ken uya je, ka We U lu Aôndo wam ye.

¹¹De gbe ca a mo ga, gadia ican zurum, man or u wasen mo ngu ga.

¹²Anomabua kpishi kasem, anomabua a taver a Bashan mough num a mo, kasem wam atô,

¹³a aver ijô sha mo, er begha u tan kume yô.

¹⁴I haam kera er mngerem yô; akuhe am cii ndivir; ishima yam hingir er tsur yô, i sough ken atô wam;

¹⁵agee am uma kera er icenge nahan, nombor wam varem sha ikighô; U va a mo hen vuulevu u kuugh.

¹⁶Gadia iwa kasem; mkohol u mbaaferev kpaa wam atô, ve kuma ave am ve pev a kua angahar am kpaa.

¹⁷Me fatyô u ôron akuhe am cii; ve kenger mo, ve bon ashe sha a mo;

¹⁸mba karen akondo am hen ayol a ve; mba eren ishor sha riga wam.

¹⁹Kpa We TERE, de gbe ca a mo ga, We, Or u wasen mo, er fefa sha u va wasen mo.

²⁰Yima uma wam sha ikev i sanker, ka u a lum môm tsô la, yima un sha ikev i iwa.

²¹Yimam sha zwa u begha; sha ikor i yaregh kpaa, U vande ungwan imo yam.

²²Me pase anmgbianev av, iti You; ka ken atô u mkohol man me wuese iti You ye.

²³Ne mba ne cie TER, wuese nen Un! Civir nen Un, ne tsombor u Yakob cii, cia nen Un, ne tsombor u Iserael cii.

²⁴Gadia A laha shin A nyagh ican i or u ican i tser nan ga, yeren nan ishigh nagh kpaa ga. Kpa zum u nan genger imo nan yila Un la yô, A ungwa.

²⁵Ka hen a We man iwuese yam i dugh ken mkohol u vesen ye; me kure uiceghzwa av sha ishigh ki mba ve cie Un la.

²⁶Mbaasemaleghlegh vea ya kwagh, á kuma ve gbing gbing je; mba ve keren TER yô, vea wuese Un! Asema a en a̱ lu uma gbem.

²⁷Akighir a tar cii aa umbur, aa gema aa rumun TER; icombor i akuraior cii ia gure sha ishigh You ia civir We;

²⁸gadia tartor ka u TER je; ka Un A tem tor sha akuraior ye.

²⁹Mba ve gbe akôr sha won cii, vea ya kwagh, vea gure, vea civir; mba ve lu hingir vuulevu cii yô, vea gure sha ishigh Nagh, ka u nan fetyô u lun uma ga je kpaa.

³⁰Tsombor u ken hemen ua civir Un; á va ôr kov u ken hemen kwagh u Ter.

³¹Vea va, vea pase perapera Na hen ikurior i á va mar i la, er ka Un A er ngun ye. Ka Pasalmi u Davidi