Read tiv Upasalmi 40 Bible Online

Upasalmi 40 - tiv bible

Upasalmi 40

¹M ver ashe hen TER a ishima i tiaver, Un kpaa, A ver ato her a mo, A ungwa mliam am.

²A dughum shin ihungwa i mtim man ken angbiôr a tiher; A ver angahar am sha vande, A taver mo sha zende wam.

³A na, m dugh icam i he, ka icam i wuese Aôndo wase je la. Ior kpishi vea nenge, vea cia, vea suur sha TER.

⁴Saan or u nan suur sha Aôndo la iyol, man nan veren ashe hen mbagengeseyol, shin hen mba ve kaha ve dondo aie la ga.

⁵TERE, Aôndo wam, U er akaa a Ou a kpilighyol ngee kua mbamhen Ou mba sha a vese la kpaa; kwagh u á kar un sha a We yô, kera ngu ga. Shin er i sarem u pasen ve, ôron kwagh ve nahan kpaa, ve ngee gande u ôron.

⁶Nagh ku sôngon man nagh ku sha samuyia ka ma kwagh u doon We ishima ga; U bughum ato. Nagh ku nanden man ku isholibo yô, U kaa Wer, i̱ na ku kpee ga.

⁷Tsô m kaa mer, nenge, m va ve, ka ken ihurenruamabera i nger kwagh wam ye.

⁸Doom u eren ishima You, Aôndo wam; atindiakaa a Ou ngam ken ishima.

⁹M yôô loho u dedoo u kwagh u perapera ken zegemkohol; nenge, m kusu zwa wam ga, TERE, U fa.

¹⁰M yer perapera Wou ken ishima yam ga, m pase kwagh u mimi Wou kua myom Wou kpaa; m yer erdoo Wou man mimi Wou hen zegemkohol ga.

¹¹We, TERE, de nyumum mhôônom Ou ma zungwen ga, erdoo Wou man mimi Wou ve̱ kuram gbem!

¹²Gadia atsan kasem gande u ôron; aferakaa am tserem je, m kera fatyô u nengen ga, a hemba ngeen a ice yam i sha ityou, ishima kpaa yinam.

¹³Wea rumun yô, yimam, TERE, TERE, er fefa sha u wasen mo.

¹⁴Mba ve keren u wuan uma wam yô, ve̱ va ahenge, kunya u̱ kôr ve cii; man mba ve ember sha ican i i tserem la kpaa, i̱ hile a ve ijime, i̱ hee ve.

¹⁵I̱ kondo ve iyol, sha ci u kunya ve, ve mba ve kaan a mo er: Ahoo! Ahoo! la.

¹⁶Mba ve keren We cii, ve̱ ember tsung, i̱ saan ve iyol ken a We; mba myom Wou a doo ve yô, ve̱ zer kaan er: TER hemba!

¹⁷Kpa mo m ngu icanor, oribanave kpaa, nahan kpaa, Ter ka A umbur mo; ka We U lu iwasen yam man Or u yimam mo kpaa ye, de ngôôr ga, Aôndo wam! Ngun ka sha ci u orhemen u mbawanatsam. Ka Pasalmi u Davidi