Read tiv Upasalmi 50 Bible Online

Upasalmi 50 - tiv bible

Upasalmi 50

¹Uhembanagee, Aôndo, TER, ngu ôron kwagh, ngu yilan tar hii sha iyangeduen je zan zan ar shin iyangemiren.

²Ken Shion u a lu mdooashe u ganden la, Aôndo mondo er iwanger nahan.

³Aôndo wase ngu van Una huan ving ga; usu ngu hian sha ishigh Nagh, uraahumbe kase Un kpishi.

⁴Ngu yilan Usha, shaala, kua tar kpaa, sha er Una ôr ior Nav ijiir yô:

⁵Kohol mba i doom a ve la imôngo her a Mo, ka mba ve ye ikur a Mo sha nagh ku sôngon je la.

⁶Usha mba pasen perapera Na, gadia Aôndo iyol Na ka Orjir. Sela.

⁷Ver nen ato, ne ior Av, Me ôr kwagh, we Iserael, Me ta kwagh ken a we ga; Mo M ngu Aôndo, Aôndo wou je.

⁸Me zôhô a we sha ci u nagh ough ga; nagh ough ku nanden, ku sha ishigh Yagh gbem.

⁹Me ngohol nombua hen ya wou ga, shin ukpev ken akumauile ou kpaa ga.

¹⁰Gadia hanma inyam i toho ka i Yam je, uzendenya sha iwo udubu imôngo.

¹¹M fa inyon i sha iwo cii; ishôso i ken toho cii ka i Yam je.

¹²Shin ijen ia kôrom kpaa Me kaa u ga, gadia tar ka u Wam kua akaa a a lu ken u cii.

¹³M ye inyam i anomabua kpa? Shin M me awambe a ivo ase?

¹⁴Na Aôndo nagh ku ishughun, kure uiceghzwa ou mba u tsegh a Uhembansha la;

¹⁵yilam sha iyange i ican, Me yima u, ú gema ú civir Mo.

¹⁶Kpa iferor yô, Aôndo ngu kaan a nan er: Ka nyi u pasen akaawan a Ama, man ka nyi u teren ikuryan Yam ken zwa wou

¹⁷er u gem u vende mkôôm, man u te mkaanem Am ken ijime you kera kpaa yôô?

¹⁸Zum u ka wea nenge a ormbaiv yô, u ya ikar a nan, u nyôr nongo a udyambaiorov.

¹⁹U er kwagh u ifer sha zwa wou, nombor wou, ngu er kwagh sha icugh.

²⁰Ka u tema u teren anngôu dang, u eren anger sha wan u ngô u a mar je.

²¹Akaa ne u er, kpa M huan ving, nahan u hen wer, M ngu er we nahan vough; kpa Me zôhô a we, Me pase a sha ashe ou.

²²Ver nen ishima sha kwagh ne, ne mba Aôndo A hungul ne yô, sha er M̱ de tusen a ven man ma or u yiman nana lu ga ze.

²³Hanma or u nan ne nagh ku ishughun yô, nan ngu civir Mo; or u nan ser gbenda u nan yô, Me tese nan myom u Aôndo. Ngun ka sha ci u orhemen u mbawanatsam. Ka Pasalmi u Davidi a dugh, zum u profeti Natan va her a na er a vande eren kwaghbo a Batesheba kera la