Read tiv Upasalmi 62 Bible Online

Upasalmi 62 - tiv bible

Upasalmi 62

¹Ka her Aôndo tseegh uma wam a veren ashe ving ye; ka hen a Na myem wam a dugh ye.

²Ka Un tseegh A lu vande wam man myem wam kpaa ye; Un ka gôgôyou wam, me tenger yum ga.

³Shi nan je man né de u tan num sha or sha u wuan un, ne cii, er kpekpeyou u a nelem man er garawen u a nenge u gbana?

⁴Mba henen ma kwagh ga, saa di u mgbeghan un sha icivir na kera; aie u eren doo ve, mba ne iveren sha zwa, kpa ken asema ve yô, ka ifan ve we ye. Sela.

⁵Ka her Aôndo tseegh ú ver ashe ving ye, we uma wam, gadia ka hen a Na man ishimaverenkeghen yam i lu ye.

⁶Ka un tseegh A lu vande wam man myem wam kpaa ye; Un ka gôgôyou wam, me tenger ga.

⁷Ka hen Aôndo man myem wam a lu, kua icivir yam kpaa ye. Vande u agee am, man ijiir yam i waren ker kpaa, ka hen Aôndo ve lu ye.

⁸Ne ikurior ne, suur nen sha a Na hanma shighe, pase nen asema a en sha ishigh Nagh; Aôndo ka ijiir yase i yeren je. Sela.

⁹Mimi je, ior mba ve lu a icivir ga, mba er humbe u karen kera nahan; mba ve lu a icivir kpaa, ka aie tsô, sha ikyekye i karen kwagh a mi yô, vea kuma ga, ve imôngo cii ve kuma sha humbe u karen kera la kpaa ga.

¹⁰De suur nen sha mkighir ga, man shi de veren ishima sha u i ga. Aluer inyaregh kia seer yô, de veren ishima sha ki ga.

¹¹Aôndo ôr kwagh, kwa môm, kwa har je kpaa, m ungwa nahan, mer: Agee yô, ka Aôndo A lu a mi ye;

¹²erdoo kpaa Tere, ka We U lu a mi ye; gadia We U na hanma or injar sha inja i tom u nan. Ka Pasalmi u Davidi dugh zum u a lu ken taaikôngo u Yuda la