Read tiv Upasalmi 69 Bible Online

Upasalmi 69 - tiv bible

Upasalmi 69

¹Yimam, Aôndo, gadia mngerem kpishi arem sha uma je.

²M mile shin angbiôr a zan, henpe fan ityô u tilen ga; m gba shin mngerem ma zan, agôndoamnger uvem.

³M yila je, m vôr, iker umam; m ver ashe sha Aôndo wam je, ashe kughur mo ikôr.

⁴Mba ve kerem ihom sha ityôikaa ga yô, ve hemba ngeen a ice yam i sha ityo; mbaihomov av mba icughuv, mba i lu ve ka timin mo kera yô, ve taver; nahan m gba kimbin kwagh u m vande ngohol un ga tsô.

⁵Aôndo, We U fa lanegh agh; aeren am a bo nga myer sha ishigh You ga.

⁶De deen mba ve veren ashe sha a We, kunya u̱ kôron ve sha ci wam ga, Tere AÔNDO u akum a Sha; de deen mba ve keren We, ve̱ zua a iheen sha ci wam ga, Aôndo u Iserael!

⁷Gadia ka sha ci Wou man i heem, kunya u cirim sha ishi ye.

⁸M hingir anmgbianev av er ka orvannya nahan, man ônov mba ngôm kpaa er orityôtyev nahan.

⁹Gadia ishima i veren sha iyou You la wuam; man aheen a mba ve heen We la, a hide sha a mo.

¹⁰Zum u m vaa shi m hôr kwaghyan kpaa yô, kwagh la gema hingir mo iheen.

¹¹Er m ta ikondo uya yô, m hingir ve kwagh u veren ishor a mi.

¹²Mba ve tem hen hundagar yô, mba ôron kwagh wam; m hingir icam i mbahundenmsôrom wan.

¹³Kpa mo yô, msen wam ngu her a We, TERE; sha shighe u doon We la, Aôndo, ungwam sha erdoo Wou u ngeen yum man sha mimi u myom Wou la.

¹⁴Dughum shin angbiôr, de deen mo, m̱ uven ga; i̱ yimam sha ikev i mba ve kerem ihom, man shin mngerem ma zan la kpaa.

¹⁵Iwuhamnger i̱ de uv a mo ga, iv i̱ de miren a mo ga, ihungwa kpaa, i̱ de cirin mo ga.

¹⁶Bugh zwa a mo, TERE, gadia erdoo Wou doo kpee; sha mhôônom Ou ma zungwen yum yô, gema ishigh ken a mo.

¹⁷De yeren wanakiriki Wou ishigh You ga, gadia m ngu ken mkighir je, bugh zwa a mo fefa.

¹⁸Kporom ikua ikua a uma wam, paa un; paam sha ci u mbaihomov av.

¹⁹We U fa ilyahan yam, man kunya wam, man iheen yam; mbaahendanev av cii, mba sha ishigh You.

²⁰Iheen nam ishimavihin je, kondo iyol, agee kera ngam iyol ga; M ker mba mhôônom ma kôr ve a mo, kpa mô lu ga, mbasurun mo ishima kpaa, m zua a min ga.

²¹Ve nam megh er ku̱ lum kwaghyan; sha imura yam i kôron kpaa ve nam vineger er m̱ ma.

²²Tebul ve a̱ hingir kper sha ishigh vegh; mkpeyol ve kpaa, i̱ hingir ve shile u hônon.

²³Ime i̱ wa ve ashe, sha er ve̱ de kera nengen ga yô, awenge ve kpaa a̱ zeren tenger gbem.

²⁴Haa iyugh You sha a ve, mvihi u iyugh You a̱ tser ve.

²⁵Ijiir i ve hee afo her la, i̱ hingir ice, ma or a̱ de kera tem ken utenti vev ga.

²⁶Gadia ve tôv un u U tsaha la, a ican, mba ôron kwagh u ishima i vihin i mba U gber ve avav la.

²⁷Seer ve a seer ibo ve la, ve̱ de nyer ken perapera Wou ga.

²⁸I̱ kough ve ken ruamabera u uma kera; i̱ de ngeren ve a mbaperapera imôngo ga.

²⁹Kpa mo yô, m ngu icanor u lun a ijungwen; yô, myom Wou a̱ kendem sha, Aôndo.

³⁰Me wuese iti i Aôndo sha icam, me civir Un sha ishughun.

³¹Á doo TER je, á hemba Un nombua, Shin bua u lun a akor kua apande kpaa.

³²Zum u mbaasemaleghlegh vea nenge yô, vea ember; ne mba ne keren Aôndo yô, asema a en a̱ lu uma.

³³Gadia TER ongo imo i mbaibanave, man lahan mbakwarev Nav kpaa ga.

³⁴Sha man tar ve̱ wuese Un, uzegembamngerev man akaa a a zenden shimi cii kpaa.

³⁵Gadia Aôndo Una war Shion, Una maa agar a Yuda, vea tema keregh je, á hingir kwagh ve.

³⁶Vor u mbayev Nav, ua ya dyako sha mi, man mba iti Na i doo ve kpaa, vea tema ker. Ngun ka sha ci u orhemen u mbaatsamev. Ka Pasalmi u Davidi, sha u umbur