Read tiv Upasalmi 74 Bible Online

Upasalmi 74 - tiv bible

Upasalmi 74

¹Aôndo, ka nyi U gbihi se kera gbeme? Man ka nyi U yugh tsum tsum a iyôngo You i U koro?

²Umbur nongo Wou u U yam ica i gba je, u U paa Wer, u̱ hingir ior i dyako Wou, kua uwo u Shion u U tem sha u la.

³Kende angahar a Ou sha, sha u zan hen icôronce la; orihom vihi akaa a ken icighanjiir la kera ca ca.

⁴Mbaahendanev Ou ta kume ken atô u ijiir i mkohol Wou, ve tim tuta ve sha, hingir ikav.

⁵Ve mba er ior mba ve kende azembe a ve sha, sha ikon i shin ikô yô.

⁶Man akaa a na a gban a gba cii mba vihin a kera sha asôm man mbamsabe.

⁷Ve nande icighanjiir Wou sha usu; ve hôngor a ijiir i iti You i tem ker la, je ve yôhôl i ve haa inya.

⁸Ken asema a ve yô, ve lu kaan er: Sé tim nen ve kera purututu; ve nande ajiir a Aôndo a i kohol ker, ken tar la cii.

⁹Se nenge a akav a ase ga; profeti kpaa kera ngu ga; man ken a vese kpaa ma or fa er i shi ga.

¹⁰Aôndo, shi nan je man or u ahendanegh una de ilyahana, man orihom kpaa una de u zeren tuhwan iti You gbeme?

¹¹Ka nyi U hile a uwegh Ough ijime, uwegh Ough ku yanegha? Dugh ku ken vanger, tim ve kera!

¹²Nahan kpaa Aôndo ka Tor wam hii ngise je, eren tom u myom sha tar.

¹³Ka We U pav zegemnger sha agee Ou ye; U hembe ityouv mbi udarakon shin mnger.

¹⁴U her ityouv mbi Leviatan, U na un a hingir kwaghyan u inyam i ken desereti.

¹⁵U pev imbor man ikuwan, mngerem due; U er uifi mba ve uman ga ve tôndo.

¹⁶Sev ka mbu Ou je, tugh kpaa ka mbu Ou; ka We je, U ver akaa a nan iwanger sha, kua iyange kpaa ye.

¹⁷Ka We U ver akighir a tar cii ye, inyom man fam kpaa, ka We U er ve ye.

¹⁸TERE, umbur er orihom a hee U, man er ior mba lanen kwagh ve toho iti You yô.

¹⁹De ne inyamtoho uma u atii Wou ga; uma u mbaatsanev Ou a̱ de hungul We zan zan ga.

²⁰Wa ikuryan iko; gadia ajiir a imegh a tar mgbough a ajiir a teman a aperagh.

²¹De rumun Wer, mba i kighir ve la, ve̱ hile ken kunya ga; mbaatsanev man mbaibanave ve̱ wuese iti You.

²²Mough sha, Aôndo ôr kwagh Wou iyou You; umbur iheen i orlanenkwagh nan shi heen We didi yô.

²³Imo i mbaahendanev Ou i̱ de hungul We ga, ka ayôôso a mba ve mough num a We, a a kende sha gbem la. Ngun ka sha ci u orhemen u mbawanatsam; i ver un sha ikenge i: De timin ga. Ka Pasalmi u Asav. Ka icam