Read tiv Upasalmi 79 Bible Online

Upasalmi 79 - tiv bible

Upasalmi 79

¹Aôndo, atôatyev nyôr ken dyako Wou, ve hôngor a icighantempel Wou, ve gema Yerusalem hingir alôgh.

²Ve gema akom a mbayev Ou hingir kwaghyan u inyon i sha kwavaôndo; man inyam i mba i doo U a ve la kpaa ve na inyamtoho.

³Ve haa awambe a ve er mngerem nahan, kase Yerusalem; ma or u iin ve kpaa lu ga.

⁴Se hingir kwagh u aheenegh hen mba ve we ndor a vese, man kwagh u nahan tar man u ahan hen mba ve kase se yô.

⁵Shi nan je, TERE, man Ú de u yuwen gbeme, man iwuhe You ia de u yeghen er usu nahan?

⁶Haa iyugh You sha atôatyev a a fe U ga yô, man sha ityartor i i yer sha iti You kpaa ga yô.

⁷Gadia ve ya Yakob, ve vihi ijiir na i teman kera.

⁸De ne se ibo sha aferakaa a uter asev ga; mhôônom Ou ma kôron, ma va hen a vese fefa, gadia se mba seelee.

⁹Wase se, Aôndo u myem wase, sha ci u icivir i iti You; yima se, ese se asorabo ase kera sha ci u iti You.

¹⁰Ka nyi man atôatyev aa pine er: Aôndo ve yô, ngu han ase? Iyevoron i sha awambe a mbayev Ou a i hee la, i̱ hingir kwagh u atôatyev a̱ fa, sha ashe ase je.

¹¹Ishimashirin i orkwar kpaa, i̱ ar sha ishigh You; mba i we ve ken ku la ve̱ war sha mvese u agee a Ou.

¹²Tere, iheen i mba ve we ndor a vese, ve hee U a mi yô, hile ve a mi ken ikum ve zan zan kwa taankaruhar.

¹³Nahan yô, se ior Ou man iyôngo You i U kor, sé wuese We gbem sha won, man sé pase iwuese You sha ikov ikov. Ngun ka sha ci u orhemen u mbawanatsam; i ver un sha ikenge i: Ulôhô mba sha Mpase. Ka Pasalmi u Asav