Read tiv Upasalmi 83 Bible Online

Upasalmi 83 - tiv bible

Upasalmi 83

¹Aôndo, de luun ving ga; de huan ga, Aôndo, de memen ga;

²gadia, nenge, mbaihomov Ou mough ayôôso, mba ve ker U ihom kpaa, ve kende iyol sha;

³mba henen kwagh u bo sha u hendan a ior Ou, mba henen imôngo sha kwagh u vea er mba U yer ve kera la.

⁴Ve kaa er: Va, sé za tim nen ve, ve̱ de kera luun ikurior ga; sha er i̱ kera umbur iti i Iserael sha won ga yô.

⁵Gadia ve hen imôngo a ishima i môm, ve zua zwa sha u hendan a We:

⁶utenti mba Edom man Mbaishemael, Moabi man Mbahager,

⁷Gebal man Amon man Amaleki, Filitia a mba ve lu ken Tiru imôngo kpaa;

⁸Ashiria kpaa nyôr nongo a ve, ve wase ônov mba Loti. Sela.

⁹Er a ve di er yan U er a Mbamidian man a Shisera man Yabin hen ifi u Kishon nahan,

¹⁰mba ve tim ken Endor, ve hingir er ihôghonov mbi sôron sule a min la nahan.

¹¹Gema ashagbaior a ve a̱ hingir er Orebi man Seebe nahan; een mbatarev vev cii ve̱ hingir, er Seba man Salmuna nahan,

¹²mba ve kaa er: Sé ngohol ajiir a teman a Aôndo, a̱ hingir a ase.

¹³Aôndo wam, gema ve, ve̱ hingir er ihundu i hiar nahan, man er imough i ahumbe a purugh a i yô.

¹⁴Er usu u hie ikô yô, man er nomborusu u u ne iwo i yeghen yô,

¹⁵tôv ve a ican ityô nahan, sha ahumbe a taver, ta ve mciem iyol sha uraahumbe Wou.

¹⁶Iv ishiv vev a kunya, sha u ve̱ ker iti You yô, TERE.

¹⁷Kunya u̱ kôr ve, i̱ kunda ve iyol gbem, i̱ nzughul a ve je, ve̱ tim kera,

¹⁸sha er ve̱ fa er We, u i yer iti You er TER la, i lu We tseegh U lu Uhembansha sha tar cii yô. Ngun ka sha ci u orhemen u mbawanatsam; i ver un sha Gititi. Ka Pasalmi u ônov mba Kora