Read tiv Upasalmi 91 Bible Online

Upasalmi 91 - tiv bible

Upasalmi 91

¹Or u nan tem ken ijiir i yeren i Uhembansha yô, nana tsa ken mure u Uhembanagee cii.

²Me kaa a TER mer: U ngu ijiir yam i yeren man iyouutya yam, Aôndo wam u m suur sha a We ne.

³Gadia ka Wen, Una yima u sha kwar u orhônoninyon, sha bouange u timin la ye.

⁴Una cir u sha akper a Na, ka ken atô u akper a Na je, ú yer ye; mimi Na ka perutya man akuvautya.

⁵Ú kera cia mcieryol u utu mayange ga, shin ivaan i i keren i atetan la kpaa ga,

⁶shin bouange u a zenden ken ime kpaa ga, shin mtim u timin sha iyange sha tembe kpaa ga.

⁷Shin er ior dubu vea gba inya hen imbusu you, man ior dubu pue hen uwegh ough ku yanegh kpaa, we yô, una mgbôghom a we ga.

⁸Sha ashe ou ú nenge a nenge iyevoron i á or mbaaferev la.

⁹Gadia ka We, U lu ijiir yam i yeren ye, TERE. U gema Uhembansha hingir ijiir you i teman;

¹⁰kwagh u bo una tser u ga, ma bokwagh u vihin una mgbôghom a tenti wou kpaa ga;

¹¹gadia Una wa mbatyomov Nav kwagh sha a we, er ve̱ kuran we sha igbenda you cii;

¹²vea tôô u sha ave ve je, sha er u̱ de kem nguhar sha iwen ga yô.

¹³Ú ndyar begha kua igbinde kpaa; gumbegha kua iyô kpaa ú ndyar ve shin angahar.

¹⁴Er M doo un ishima tsung yô, ka nahan man Me war un ye; Me kende un sha, sha ci u a fe iti Yam yô.

¹⁵Zum u una yilam yô, Mo kpaa Me ungwa imo na; ken ican Mo Me lu a na, Me yima un, shi Me civir un kpaa.

¹⁶Me na un ayange a tsan sha won, je, á kuma un gbing gbing, Me pase un myom Wam kpaa. Ka Pasalmi. Ka icam i sha Lahadi