Read tiv Upasalmi 92 Bible Online

Upasalmi 92 - tiv bible

Upasalmi 92

¹U sughun TER ka kwagh u dedoo, man u wan atsam a wuese iti You, We Uhembansha,

²u pasen erdoo Wou pepe, man jighjigh Wou kpaa hanma tugh,

³sha adiguve u vesen man u kiriki kpaa, sha imo i kôron sha molo.

⁴Gadia U erem saan mo iyol sha tom Wou, TERE; me ember sha ityom i ave Ou.

⁵Ityom You gba ikôr mimi, TERE! mbamhen Ou za kpishi.

⁶Orlanenkwagh fe ga, ibumeor kpaa nan kaven kwagh ne ga:

⁷Zum u mbaaferev ka vea menden er toho nahan, man mbaerenafer kpaa á kpe ve iyol yô, i lu sha u á tim ve kera gbem tsô.

⁸Kpa We yô, TERE, U ngu sha, gbem sha won.

⁹Gadia nenge, mbaihomov Ou, TERE, nenge, mbaihomov Ou vea tim; mba ve eren aferakaa cii, á sambe ve kera.

¹⁰Kpa U kende a korough agh sha, er ka ku iyaregh yô; i haam mkurem ma hem iyol.

¹¹Ashe am nenge awashima wam sha mbaihomov av, ato am kpaa ungwa kwagh u mbaerenakaabo, mba ve mough num a mo.

¹²Orperapera nana vese, nana hôm yaghelaa er kughugh nahan, nana vese er sedar u sha Lebanon yô.

¹³I môôr ve ken iyou i TER, á kpe ve iyol ken ityembe i sha ishigh ki iyou i Aôndo wase.

¹⁴Vea ume atam a iyol i been ve her; vea lu a zar kpishi, shi vea lu gese gese kpaa,

¹⁵sha u pasen er TER A lu u perapera yô; Un ka vande wam, kwagh u a lu perapera ga ngu ken a Na kpaa ga.