Read tiv Anzaakaa 23 Bible Online

Anzaakaa 23 - tiv bible

Anzaakaa 23

¹Zum u wea tema a ortaregh imôngo hen kwaghyan yô, ver ishima dedoo sha kwagh u a lu u sha ishi la.

²Penda ihô sha iker you, aluer wea lu or u kwaghyan doon we yum yô.

³Akaayan a na a nyohon a̱ de sar u ga, gadia ka kwaghyan u imeen je.

⁴De eren iyol you ican wer, ú lu ornyar ga, de zaan hemen u veren ishima you sha mi ga;

⁵sar u ka veren ashe sha mini? Yô, ki ga; gadia ki wa akper fefa je, er gafa ka a purugh a yem sha nahan.

⁶De ye kwaghyan u or u nan kenger ashe a iyongo ga, akaayan a nan a nyohon kpaa a̱ de saren we ga.

⁷Gadia er nan henen ken ishima i nan la, kape nan lu kpaa la; nana kaa a we er: Ya kwagh, ma kwagh, kpa ishima i nan yô, ngi a we ga.

⁸Anivur u u ye la kpaa ú sua un kera, akaaôron ou a dedoo kpaa aa saa u.

⁹De er kwagh sha ato a ibumeor ga, gadia nana laha kwaghfan u akaaôron a ou la.

¹⁰De kper a ikav i ipaventar u tse la ga, man shi de nyer ken ishule i ancôgholov kpaa ga,

¹¹gadia Orpaan ve taver tsô, Una ôr kwagh ve, Una na u ibo.

¹²Ver ishima sha u ungwan ityesen, ato a ou kpaa sha u ungwan akaaôron a sha mfe.

¹³De deen u tsahan wanye ga, gadia wea gbidye un sha kwagir kpaa una kpe ga;

¹⁴ú gbidye un sha kwagir yô, ú yima uma na shin Sheol je.

¹⁵Wan wam, aluer ishima you ia lu a kwaghfan yô, mo iyol yam kpaa, á saan mo ken ishima.

¹⁶Een, ahi am aa ember, aluer zwa wou ua ôron akaa a vough yô.

¹⁷Ishima you i̱ de tem kwagh u ior mba bov ga, kpa lu ken mcie u cian TER iyange jimin cii.

¹⁸Gadia injar ngi ken hemen kpee je, man ishimaverenkeghen you kpaa, á bunde i ga.

¹⁹Ungwa ase, wan wam, fa kwagh kpaa, ver ishima you sha gbenda jighilii.

²⁰De luun a mbamanmsôrom imôngo ga, shin a mbaeren hua sha inyam kpaa ga.

²¹Gadia or u hunden msôrom man or u eren hua vea hingir mbaibanave; mnyam ma meer kpaa maa cir or ajav iyol.

²²Ver ato sha teru u a mar u yô, de lahan ngôu shighe u a bee iyol la ga.

²³Yam mimi, de teen un ga, een, kua kwaghfan man ityesen man mkav kpaa.

²⁴Ter u orperapera nana ember kpe kpe, or u nan mar wan u fan kwagh yô, nana zua a iember sha a na.

²⁵De teru man ngôu ve̱ ember, ngôu u a mar kpaa, i̱ saan un iyol!

²⁶Wan wam, nam ishima you, i̱ saan ashe ou iyol sha igbenda yam.

²⁷Gadia idyakwase ka ihungwa i zan je, agbaga kpaa ka ijôr i hoghol je;

²⁸een, ka a ôso er ka ornumungbenda yô, seer mbamimiga ken ônov mba iorov.

²⁹Ka an nan kaan er: Ayoo! Man ka an nan kaan er: Kpe ahii! Man ka an nan lu a inyumu? Ka an nan vaan icana? Ka an nan gbe tôndon avav iyol a ityôikaa ga nahana? Ka an nan lu ashe jaanga?

³⁰Ka mba ve shi hen wain; ka mbakeren wain u i nongo un la.

³¹De kenger wain zum u a nyian la ga, er a tese iengem na shin iyongo, u una senen liemenee;

³²ken masetyô yô, ka a nyuma er iyô, ka a gber er igbinde nahan.

³³Ashe ou aa nenge akaa a u lu a nenge a mi ga yô, man ishima you ia ôron akaadang;

³⁴een, ú hingir er or u yaven her atô u zegemnger nahan, shin er or u nan yav sha ityough ki ityôgh ki tsogh yô.

³⁵Ú kaa wer, ve gbidyem, kpa nyoon mo ga, ve gbidyem tsung, kpa m kav mbu ga; ka hanma shighe je me ndere? Me shi me ker un!