Read tiv Anzaakaa 6 Bible Online

Anzaakaa 6 - tiv bible

Anzaakaa 6

¹Wan wam aluer wea hingir ishuur sha ci u or u nan we ndor a we, aluer wea ngohol uwegh ku orvanava yô,

²i hôn u sha kwaghôron u sha zwa wou, i kôr u sha kwaghôron u sha zwa wou je ve;

³yô, er ase nahan hegen, wan wam yima iyol you, gadia u hingir sha ikev i or u wan ndor a we je ve; hide, za za shar inya, zamber or u wan ndor a we la.

⁴De ne ashe ou mnyam ga, akurashee a ou kpaa a̱ de meer mnyam ga;

⁵tsuwe iyol you sha uwegh ku orough kera er ashim nahan, man shi er inyon nahan sha ikev i orhônon.

⁶Za hen iyôn, we oruhwe; ver ishima sha aeren a i; yô, hingir orfankwagh;

⁷ngi a or u hemen i ga, shin ornengen sha i, shin ityoor kpaa ga,

⁸nahan kpaa ka i kohol kwaghyan u i inyom, i koson iyiav mbi i sha shighe u sunda.

⁹Ka hanma shighe ú de mnyama, we oruhwe, man ka hanma shighe man ú nder ken mnyam ouwe?

¹⁰Mnyam mase shin kpeghee, shi mnyam ma meer kpuaa, man shi ave a wan ikum kpeghee sha u memen—

¹¹ka nahan man ibanave you ia bur u er ka ornumungbenda nahan ye, man mban u akaa ou kpaa er orutya nahan.

¹²Gbilinor, iferor, ngu zenden a ifer sha zwa;

¹³ngu nyiar ashe, ngu ôron kwagh sha angahar, ngu tesen ikav sha ahôaveegh;

¹⁴ifer ngi ken ishima na, ngu senden ior ityough, nan mpav,

¹⁵ka nahan man mtim na una va abur abur ye, ú sombo un fese je, mwar á kera lu ga.

¹⁶Akaa nga ataratar a TER A vende yô, een, ataankarahar je kpaa, a ishima i ndôhôr Un a a yô:

¹⁷Ashe a sha imanger, man nombor u aiegh, ave a haan awambe a or u lun a ibo ga,

¹⁸ishima i henen mbamhen mba bov, angahar a zan ayem sha u za eren ifer,

¹⁹or u eren shiada u mimi ga, u nan eren aie, man or u senden ior ityough nan anmgbianev mpav.

²⁰Wan wam wa tindi u teru iko, ityesen i ngôu kpaa de undun i ga;

²¹kange i ken ishima you gbem, har i sha mon wou;

²²zum u u zenden yô, vea hemen we gbenda; zum u u yav kpaa vea kura u zum u u nder yô, vea ôr kwagh a we.

²³Gadia tindi ka imenger je, ityesen kpaa ka iwanger, myange u sha mtsaha ka gbenda u uma je;

²⁴sha u kuran we sha iferkwase, sha zwanyohon u nombor u u fe nan ga la.

²⁵Dooashe u nan la, a̱ de saren we ken ishima ga; nana̱ de ker u sha akurashee a nan ga.

²⁶Gadia sha ci u idyakwase tsô, or ka nan mase hingir oribanave; kwase u orgen kpaa ka nan yar ikôr sha uma u or jim.

²⁷Or á fatyô u veren usu sha vanger u nan, man akondo a nan á hia ga kpa?

²⁸Shin or á fatyô u ndyaren sha akausu, man angahar a nan á hughum ga kpa?

²⁹Kape or u nan nyer hen kwase u or u nan we ndor a nan kpaa nan lu la; hanmô u nan bende a na yô, nana lu a isho ga.

³⁰Mba gbe lahan ormbaiv ga, aluer nana ii sha u been msar u nan zum u ijen i ker nan yô,

³¹kpa aluer á va fa nan yô, nana hile a mi kwa taankaruhar, nana na akaa a ken ya u nan cii.

³²Or u nan er idya a kwase yô, nan kav kwagh je ga, or u nan er nahan la, ka uma u nan nan lu timin ye.

³³Avav á tser nan kua iheen, kunya u nan la kpaa á kera ese u mayange ga.

³⁴Gadia iwuhe ka ishima i vihin i or je, nan de kwagh la, sha iyange i oron iyev mayange ga,

³⁵mpaa una lu nan nan kpaa nana wa iko her ga, ishima ia pever nan ga, shin wea na nan iwua kpishi je kpaa.