Read tiv Orpasenkwagh 10 Bible Online

Orpasenkwagh 10 - tiv bible

Orpasenkwagh 10

¹Iji i kpen ka i na mkurem ma ornungwan mkurem ma human doon la, ma huma, ma hôô kpaa, ibumegh kpuaa ka ki yuhwa ki hemba kwaghfan kua icivir kpaa.

²Ishima i orfankwagh ka i za a nan ken iyan; kpa ishima i ibumeor yô, ka i za a nan ken imese.

³Zum u ibumeor ka nan zenden sha gbenda yô, mkav a yina nan, nan kaan a hanma or er nan lu ibumeor yô.

⁴Aluer ishima i ortaregh ia kende sha a we yô, de karen hen ijiir you kera ga, gadia ishima i bem ka i yange ifer i vesen.

⁵Kwaghvihin ngu u m nenge a mi shin tar yô, ka mtsum u a dugh hen ortaregh yô:

⁶ka i kende a ibumegh sha kpishi, man mbanyarev gema tema hen ijiir i gban ijime.

⁷M nenge ikpan henda anyinya, man ônov mba torov gema lu zenden shin inya er ka ikpan nahan.

⁸Or u nan tim ihungwa yô, nana gba shimi; man or u nan tsehe igyar i awen kpaa, iyô ia nyima nan.

⁹Or u nan bugh awen yô, nana vihi iyol sha a; man or u nan aren ikon kpaa kwaghvihin una fatyô u tseren nan.

¹⁰Aluer iyôgh kia kpughul man or nana wua zwa u ki ga yô, nana seer u gberen sha agee; kpa kwaghfan ngu a inja sha u nan er kwagh á kure vough.

¹¹Aluer iyô ia vande nyuman or kera er i lu a kumbur i ga yô, kera ka a inja u orfanzwa nana va kumbur i ga.

¹²Akaaôron a sha zwa u orfankwagh ka a doo ken ato, kpa ityumbuzwaagh i ibumeor ia mena iyol i nan.

¹³Mhii u akaaôron a sha zwa u nan ka ibumegh je, mkur u kwaghôron u nan kpaa ka ihundugh ki dang je.

¹⁴Ibumeor nan ngee kwaghôron; kpa or fa kwagh u una va er ga; man kwagh u una lu ken ijime i nan kpaa, ka an nana kaa unu?

¹⁵Tom u sha ican u ibumeor ngu ne nan iyol i kpen, gadia nan fa gbenda u nyôron ken gar ga.

¹⁶Kwagh tser tar u tor u u a lu iyev yô, man atiator a u kpaa a yaan iniongo pepe je!

¹⁷Saan we iyol, we tar, aluer tor wou una lu wan u ormimi je yô, man atiator a ou lu yan kwagh sha shighe u a doo yô, er nomsombaiorov nahan, er mbahundenmsôrom nahan ga.

¹⁸Sha hwev yô, hav ka mbu piin; man ka sha uwer u gban, iyou ka i nôô ura ye.

¹⁹Ka i er iniongo sha ci u ahan a sen; wain yô, ne ishima i saan saan; inyaregh di ki kur akaa cii.

²⁰De toho tor, ken ishima you kpaa ga, man de toho ornyar ken iyou you i yaven ga, gadia inyon i sha ia za a imo you, kwagh u lun a akper una za pase kwaghôron wou la.