Read tiv Orpasenkwagh 4 Bible Online

Orpasenkwagh 4 - tiv bible

Orpasenkwagh 4

¹Tsô m gema m nenge ipila i i eren shin tar cii; man nenge, mliam ma mba i kighir ve la, man ve lu a orsurun ve ishima ga; mba ve kighir ve la ve lu a tahav, kpa ve lu a orsurunshima ga.

²Nahan m wuese mbakpenev mba ve vande kpen la, hemba kpen ve iyol a mba ve lu uma her yô;

³een, or u nan lu a vande lun ga je, nan hemba ve uhar cii, ka u nan nenge a tom u ifer u i er shin tar ne ga yô.

⁴Tsô m gema m nenge tom u ican cii, man hanma tom u i er u u hembe doon yô, i lu sha iwuhe i lu eren u ye. Kwagh ne kpaa ka gbilinkwagh man ka u zendan di ahumbe ityô tsô.

⁵Ibumeor ka nan wa ave ikum, nan gba yan inyam i iyol i nan je.

⁶Guda uwegh môm ku ku iv a mmem a ave ahar a a iv a ican kua u zendan ahumbe ityô la.

⁷Tsô, shi m gema m nenge gbilinkwagh shin tar.

⁸Orgen ka nan lu tswen, nan lu a ma orgen ga, een, shin wan kpaa ga, shin anmgbian tsô kpaa ga, nahan kpaa tom u nan u ican, u kuren ga, ashe a nan kpaa a kenger inyaregh ki kuman a ga. Ka sha ci u an je m ye icana man m gbe nyumen uma wam akaa a doon nahan? Kwagh ne kpaa ka gbilinkwagh tsô, een, ka ican tsung je.

⁹Guda uhar a u môm, sha ci u mba a injar i dedoo sha tom ve u sha ican.

¹⁰Gadia aluer vea gba kpaa, u môm nana kôr ugen nana mough a nan sha; kpa, kwagh á tser u nan lu tswen la, aluer nana gba yô, nana lu a or u moughon a nan sha ga.

¹¹Man shi aluer ior ihiar ia yav ijiir i môm yô, á tsee ve iyol; kpa á lu or môm tsô yô, á er nan man á tsee nan iyolo?

¹²Man shi aluer or á hemba u a lu tswen la, kpa mba uhar vea gema á hemba di nan; kor u i zômon u igbar itiar yô, ngu fetyô u tôndon fese ga.

¹³Guda wanyekwaor u gban ican, u fan kwagh, a ibumetor u a tse sha won, u a gande u ungwan kwaghwan yô;

¹⁴gadia ngula ka ken gaadi a dugh sha u va yan tor ye, shin er i mar un a ibanave ken tar u tor la kpaa.

¹⁵M nenge mbaumav mba ve zenden shin tar cii, ve ta ken wanyekwaor la, ka u sha uhar je la, wen u una tema sha ityough ki ngula la,

¹⁶ior ngee gande ikaa inya mba a lu orhemen ve yô; nahan kpaa kov u ua va ken hemen yô, ua ember un ga. Mimi je kwagh ne kpaa ka gbilinkwagh, man ka u zendan di ahumbe ityô tsô.