Read tiv I Solomon 6 Bible Online

I Solomon 6 - tiv bible

I Solomon 6

¹Ka han u a doo u ishima la a ze, we u udoo ashe, u hembe kasev cii ne? Ka han u a doo u ishima la a ver ishigh, er sé ker un a we imôngo?

²U a doom ishima la sen shin sule na, shin mbaagbegi mba ilyôghonov mbi human doon, sha u za nan ilev toho ken ishule man sha u kohol uimondon mba uityombo.

³U a doom ishima la, m ngu u na, un di kpaa ka u wam; ngu nan ikumuile na toho ken atô u uimondon mba uityombo.

⁴We u u doom ishima ne, u doo ashe er Tirsa nahan; u doo u kenger er Yerusalem nahan, u cier iyol er akumautya a a lu a ityuta nahan.

⁵Tôô ashe sha a mo kera, gadia a cier mo iyol. Ice you ngi er ikpilaivo, i i hongo sha Gileadi yô.

⁶Anyi ou nga er ikum i ungômbaiyôngov yô, i i dugh sha ijiir i ôôn iyol, i hanmô i lu a ônov uhar uhar yô, i mô i môm ngi tswen ga.

⁷A-ase a ou nga er pomegraneti u i pav un avegher ahar nahan, ken ijime i ikondo you i yisan la.

⁸Utormbakasev mba akunduatar, kasev mba sha uika akunduanyiin, mbayevkasev gande u ôron.

⁹Atii wam, u lun inja jighilii, ngum môm tsô, ngu wan u ngô na môm, ngu wan u ishima ishima u u a mar un la. Ônkasev nenge a na, ve wuese un ve ver un doo doo; utormbakasev kua kasev mba sha uika kpaa ve wuese un.

¹⁰Ka an nan dugh nan kôndo sha, er iwanger i sha use nahan, doo ashe er uwer, wang er iyange yô, man cier iyol er akumautya a a lu a ityuta nahana?

¹¹M sen shin sule u ikon i ahii sha u me za nenge akaa a a mende shin pev la, sha u me za nenge itinewain ia hôm, man upomegraneti vea kpar yô.

¹²Er lu a wanger mo ga je tsô, isharen yam yem a mo za verem sha akeke a ior av mba mimi la.

¹³Hide, hide, wankwase u Shulam; hide, hide, sé kenger we. Ka nyi i sar ne u kenger wankwase u Shulam, er ka amar a i lu vinen hen Mahanaim la nahana?