Read tiv Yesaia 13 Bible Online

Yesaia 13 - tiv bible

Yesaia 13

¹Mkaanem ma Aôndo sha Babilon, ma Yesaia wan u Amoshi nenge yô.

²Kende nen tuta sha sha uwo u penem penem, genger nen imo yila ve, viligh nen ave, ve̱ nyôr sha ihinda i atiator.

³Mo iyol yam je, M na mba M tsegh ve la zwa, M yila mbaageev Av Mer, ve̱ er sha ishima i vihin Yam, ka mba Av mba ve te ihagh, ve ember yagh yagh la.

⁴Ungwa, ayôôso baver baver sha iwo er ka zegeikumior yô! Ungwa, ayôôso a ityartor i akuraior a a kohol imôngo yô! TER u akum a Sha ngu kohol ikumutya sha ci u ityav mbi nôngon.

⁵Mba za van ken tar u icaa, sha ikighir i Sha je, ka TER a ikav mbi tomov mbi iyugh Na, sha u timin tar cii je la.

⁶Gbidye nen vaa, gadia iyange i TER mgbôghom ve, ngu van er ka mtim u a dugh sha Uhembanagee cii yô.

⁷Ka nahan man ave cii á shir livaa, ishima i hanma or kpaa ia sough;

⁸mciem maa ta ve iyol, mtoghor man asemavihin aa tser ve, á nyoon ve er kwase u nan toghol mar nahan; vea kenger ayol a ve a anzughul ken ishima; ishiv vev yô, mbia lu er mbi usuv nahan.

⁹Nenge, iyange i TER ngi van, ngi a mhôônom ma zungwen ga, ngi a ishimavihin kua iyugh i tsung, sha u geman tar u̱ hingir ice dang, man shi u timin mbaasorabo mba ve lu ken u kera.

¹⁰Gadia asan a Sha man uzegembaiwangerev mba Shaav vea kera na iwanger ga, iyange ia wa ime sha mdugh u i, uwer kpaa ua kera ta iwanger ga.

¹¹Me tsaha tar sha ci u kwaghbo u u, mbaaferev kpaa sha ci u ifer ve; Me na, ihagh i mbagengeseyol ia bee, man ityough ki kehen ki ior mba aperav kpaa, Me hee ki.

¹²Me er, ior vea za ihyen, á hemba zenaria u wang, een, ior vea za ihyen hemba zenaria u Ofir je.

¹³Ka sha ci u nahan Me er Usha vea tenger, tar kpaa ua tenger ua kar hen ijiir i u la kera, sha iyugh i TER u akum a Sha, sha iyange i iyugh Na i yeghen tsung la.

¹⁴Tsô er ashim u i zende un ijime man er iyôngo i i lu a or u kumban i ga yô, kape hanma or kpaa, nana gema á yem hen ityô i nan la, man hanma or kpaa, nana yevese nana yem hen tar u nan.

¹⁵Hanma or u á kohol nan yô, a tume nan á due keela, man hanmô u á kôr nan kpaa, nana kpe ku u sanker.

¹⁶Á hyer anikundanev vev hen inya sha ashe ve, á sar uya vev, á nzughul a kasev vev kpaa.

¹⁷Nenge, Me kpoghol Mbamede, ve̱ er num a ve, ka ior mba ve we azurfa iko ga yô, zenaria kpaa doo ve ga.

¹⁸Mbaada vev vea haa ikaior inya; mhôônom kpaa maa kôr ve a ônov mba ken uya ga, ishe ve kpaa ia zungwe mbayev ga.

¹⁹Babilon, icivir i ityartor, mdoom ma ihagh i Mbakaldi la, una lu er Sodom man Gomora nahan, zum u Aôndo yan tim ve kera la.

²⁰Á kera tema ya her mayange ga, ior á kera tema ker ga, sha ikov ikov, Orarabia nana tim tenti her ga, mbakuranilev kpaa vea er akumauile á za yav her ga.

²¹Kpa inyamtoho ia yav her; uya vev vea mgbough a avungu; ukonkofi vea tema ker; ujijingi mba bov mba ken toho vea vine amar ker.

²²Ugbaseela vea vaa ken ayouautya ve, acire kpaa, ken ayouator a dedoo; shighe na kuma ve, á kera seer ayange na ga.