Read tiv Yesaia 14 Bible Online

Yesaia 14 - tiv bible

Yesaia 14

¹Gadia TER Una zungwe Yakob mhôônom, Una shi á tsuwa Iserael, Una ver ve er ve̱ tema ken tar ve; ior mba ken nongo ugen kpaa vea nyôr nongo a ve, vea var hen ya u Yakob.

²Akuraior a sha won aa kua a ve aa yem a ve ken tar ve; ya u Iserael kpaa una ya dyako sha ve ken tar u TER, vea hingir ve ikpan i nomso man i ukase, vea kôr mba ngise ve kôr ve la, vea tema tor sha mba ngise ve kighir ve la.

³Tsô sha iyange i TER Una na u mmem sha ishima i zungwen you man sha mmemga wou kua tom u ican u i ver u sha mi la,

⁴ú gema ipilaikaa sha tarnahan, ú gba teren tor u Babilon wer: Kape orkighir ior a ican a kur ne! Mkighir bee!

⁵TER sombo gbough ku mbaaferev, ka tôgh ku mbatarev

⁶ku ku zeren gbidyen ior sha ishimavihin la, ku ku tem tor sha akuraior sha iyugh sha mkighir u sha ican a mhôônom ma zungwen ga la.

⁷Tar cii hingir bem bem, u mem; i gba wan atsam ember.

⁸Ikon i fer kpaa ngi ember we; usedar mba sha Lebanon mba kaan er: Er i yôhôl u kera yô, ma or u gberen ikon nan ngu a kôndo sha vese ga.

⁹Sheol u shin mkur u inyaagh je kpaa hingir gudu gudu sha ci wou, sha u va keghen we gbenda; ngu kpoghol ujijingi mba mbakpenev sha ci wou, ka ukpev mbatarev je la, a er utor mba akuraior cii ve mough sha, sha mkônom vem ma torom.

¹⁰Ve cii vea bugh zwa vea pine u er: We je kpaa, u hingir seelee er se yôô? U hingir er se nahan vee?

¹¹I hungwa a imanger you shin Sheol je kua imo i umolo ou kpaa; i tar u azôô shin, shi azôô cir u iyol kpaa.

¹²U osough Sha, u gba kpen kpen, we, Lushifer, wan u Use! I gber u, i gbihi inya je, we u u sar akuraior kera ne!

¹³U kaa ken ishima you wer: Me kôndo Sha, me kende ikônough yagh ki torough Sha je; kia kar asan a Aôndo sha je; me tema sha Uwo u Mkohol, ken zuer u imbusutarimese,

¹⁴me kôndo sha, me kar abeen a hemban gban ca la, me hingir er Uhembansha nahan,

¹⁵nahan kpaa i gema i gbihi u shin Sheol, hen ajiir a hemban zan shin ihungwa la.

¹⁶Mba ve nenge a we vea kenger we ashe, vea hen kwagh sha a we, vea kaa er: Ka or u a ne tar u gbidi akarkase iyol man a tenger ityartor,

¹⁷a gem tar u hingir ikôngough dang, a yôhôl agar a u, a pase mbakwarev nav ve hidi hen ya ve ga, nee?

¹⁸Utor mba akuraior cii, ve cii, ka ken icivir ve yav ye, hanmô hen ya u nan,

¹⁹kpa we yô, i ta u kera, u gba ca a uwar wou, er gbaa u dang nahan, i cir u, mba i woo ve la iyol, mba i kom ve sanker a dugh keela la, mba ve sen shin awen a shin ihungwa er ikom i i ndyar i angahar yô.

²⁰Á zua u a ve shin uwar imôngo ga, gadia u tim tar wou, u wua ior ou. Á kera ter iti i tsombor u mbaaferev sha won ga.

²¹Wa nen ago iyol sha u wuan ônov nav, sha ci u ifer i uter vev, sha er ve̱ de moughon, ve̱ ngohol tar, ve̱ ivin agar sha tar ga.

²²Me mough Me er num a ve, kape TER u akum a Sha A kaa la, Me tim Babilon iti kera, man asande a a shi her, man wan kua wan u wan kpaa, kape TER A kaa la.

²³Me gema un á hingir sha ikev i mbaadendem man shi una lu atunguamnger; Me ese un kera sha canca u mtim kpaa, kape TER u akum a Sha A kaa la.

²⁴TER u akum a Sha bum kaa er: Mimi je, er M hen nahan, kape á er la; man er M ver ishima nahan, kape á lu la;

²⁵Me sombo Orashiria ken tar Wam, man sha iwo Yam kpaa, Me ndyar un shin angahar; tsô igbur na ia osogh sha ve kera, ikav nav kpaa mbia kar sha avande a ve kera.

²⁶Ka awashima u i we a tar cii je la; man ka uwegh ku ku naregh sha akuraior cii je la.

²⁷Gadia TER u akum a Sha wa ishima kera je, man ka an nana bunde unu? Uwegh Nagh ku naregh, yô, ka an nana hule ku?

²⁸Sha inyom i tor Ahashi kpe la, mkaanem ma Aôndo man va er:

²⁹We, Filisetia man ne mba keregh cii, de ember nen er gbough ku i gbidye u a mi la ku sombo kera ga, gadia ken mise u iyô yô, igbinde ia due, tsombor na kpaa ua lu iyô i usu i purugh.

³⁰Waniunda u icanor kpaa una ya kwagh, oribanave kpaa nana yav bem bem. Me wua mise wou sha ijen, asande a ou a a shi her la kpaa, Me wua a kera.

³¹Genger mliam, we, hundagar; gbidye vaa, we, gar; sough kera, we, Filisetia man mba keregh cii; gayô ka ken imbusutarimese mnyim ma dugh ye, ma or u gban ijime ken tangeutya na nan ngu ga.

³²Ka nyi kwagh, á ôr mbatyomov mba ikurior ne? TER ver Shion, nahan ka ker man ior Nav mba ve ye ican vea yer ye.