Read tiv Yesaia 2 Bible Online

Yesaia 2 - tiv bible

Yesaia 2

¹Kwaghôron u Yesaia wan u Amoshi nenge sha Yuda kua Yerusalem la.

²Sha ayange a masetyô yô, uwo u iyou i TER ua tile dông, ua tav sha ua hemba iwo cii, á kende u sha, ua hemba agungu; akuraior cii aa kôndo sha u iuu.

³Ior kpishi vea za, vea kaa er: Va sé kôndo nen sha uwo u TER, sha iyou i Aôndo u Yakob, A̱ tese se igbenda Na, se kpaa sé zende sha igbenda Na; gadia ka ken Shion man tindi una due ye, kua kwaghôron u TER kpaa ken Yerusalem.

⁴Una ôr ijir her atô u akuraior, Una kure kwagh u ior kpishi; nahan vea gema usanker vev, vea var indyuhar a mi, awange a ve kpaa aa hingir ahô a sôron ikon a mi; ikurior igen ia kera tsuwa sanker a ikurior igen ga, vea kera hen ityav mbi nôngon kpaa ga.

⁵We ya u Yakob, va sé zende nen ken iwanger i TER.

⁶Gadia U ta ior Ou, ya u Yakob kera, gadia ve iv a akaa a sha inja i mba sha ityoughkitaregh la, ve ka mbakpehenasor sha inja i Mbafiliti, man shi ve nyôr nongo a ônov mba ior mba tar ugen.

⁷Tar ve mgbough a azurfa man zenaria, inyaregh vegh ngee je gande; man tar ve mgbough a anyinya; akeke a ve a utya kpaa ngee je gande.

⁸Tar ve mgbough a akombo kpaa; mba gur mba civir tom u ave a ve, kwagh u ahôaveegh a ve, a er la.

⁹Kape uuma, ve hingir dang ne, man ior ve hee ayol a ve la; de deen ve kwaghbo ve ga.

¹⁰Nyôr ken vande, yer shin inya, sha ci u mcieryol u TER, man sha ci u icivir Na i hemban la.

¹¹Ashe a a kenger sha ilyahan la, á hee a, man iyol gengese i or kpaa á hide a i ijime, Ka TER tseegh Una lu a icivir sha iyange la ye.

¹²Gadia iyange i Ter u akum a Sha ngi van sha mbaihaghev man mbagengeseyol cii, man sha akaa a i kende a sha kpaa, sha ci u hiden a a ijime,

¹³man sha usedar mba Lebanon cii, mba ve tav ve kende sha la, man sha uouki mba Bashan cii kpaa,

¹⁴man sha iwo i taven cii, man sha agungu a kenden sha cii,

¹⁵man sha hanma gôgôyou u taven, man sha hanma gilgar u taver,

¹⁶man sha utso mba Tarshishi cii, kua sha akaa a doon ashe a engem.

¹⁷Á hide a iyolmoron i uuma la ijime, iyolgengese i ior kpaa á hee i; ka TER tseegh Una lu a icivir sha iyange la ye.

¹⁸Akombo kpaa á kar a mi kera purututu.

¹⁹Ior vea nyôr ken ubarmbaiwoov man ken ijô i shin inya, sha ci u mcieryol u TER man sha ci u icivir Na i hemban la, zum u Una mough sha u tan tar mciem iyol la.

²⁰Sha iyange la yô, or nana haa akombo a nan a azurfa kua akombo a nan a zenaria kera, a nan er sha ci u gulen civir a la, nana gema a, nana gbihi ijuhyev man anema,

²¹sha u nana nyôr ken ubarmbaiwoov man ken ikwe i avande kpaa, sha ci u mcieryol u TER man sha ci u icivir Na i hemban la, zum u Una mough sha u tan tar mciem iyol la.

²²De suur nen sha or ga, u iôôn i nan i lu ken ahenga a nan, gadia nan kuma u wan nan iko hana?