Read tiv Yesaia 26 Bible Online

Yesaia 26 - tiv bible

Yesaia 26

¹Sha iyange la á wa icam ne ken tar u Yuda er: Se mba a gar u taver; A ver myom er, a̱ lu gilgar kua akpagar.

²Bugh nen ihinda, ikurior i perapera i lun a jighjigh, i̱ nyôr.

³Ishima i tiaver i geman kposo ga la, Ú kura i, ia lu bem bem, gadia ngi suur sha a We.

⁴Suur nen sha TER gbem sha won; gadia TER AÔNDO ka vande u tsôron je.

⁵Gadia mba ve tem sha la, A hide a ve shin inya, ka gar u taven sha je la; A yôhôl un, A haa un inya je, A samber un inya zan zan shin vuulevu je.

⁶Nguhar ua ndyar un, ka angahar a mbaatsanev kua angaharandyaren a mbaibanave je la.

⁷Gbenda u orperapera ngu vaanaa; ka U sôr gbenda u orperapera u lu shambe shambe.

⁸Sha gbenda u ajiraôron a Ou kpaa, TERE, se lu keghen We. Iti You man m-umbur u umbur We la, sar uma wase tsung.

⁹U sar uma wam tugh tsung je, jijingi wam u ken a mo kpaa ngu keren We sha gbashima; gadia shighe u ajiraôron a Ou a lu sha won yô, mba ve tem shin tar la mba henen perapera.

¹⁰Ka a zungwe iferor mhôônom kpaa, nan hen u eren perapera ga, nan eren iferkwagh ken tar u mimi je, nan nengen a icivir i TER i hemban la ga.

¹¹TERE, shin er uwegh Ough ku kende Sha nahan kpaa, mba nengen ga; kpa vea va nenge man kunya ua kôr ve sha gbashima Wou u sha ior Ou la; usu ua hia mbahendan a We la.

¹²TERE, Ú ver se bem, gadia ityom yase cii kpaa ka We U er se i ye.

¹³TER, Aôndo wase, uter mbagenev vande teman tor sha a vese, lu We tseegh ga; kpa ka iti You tseegh sé civir i ye.

¹⁴Mbakpenev mba nderen ga, ujijingi mba mbakpenev mba moughon ga; ka nahan man Ú va sôr ve, Ú tim ve shi Ú ese m-umbur u ma i umbur ve sha won la kera ye.

¹⁵We, TER, U seer ikurior iyenge, U seer ikurior iyenge, i kende icivir You sha; U gbanger akighir a tar la cii.

¹⁶TERE, ken ican yô, ve ker U, shighe u mtsaha Wou lu sha a ve la, ve gba eren msen.

¹⁷Er kwase u wan iyav, shighe u nan u maren ka una mgbôghom yô, nan toghor, nan genger imo ken mnyoonom nam, kape se kpaa se lu sha ishigh You la, TERE.

¹⁸Se wa iyav, se toghor, bee er ka ahumbe se mar yô; se va tar a ma myom ga, i kera mar mba vea tema shin tar kpaa ga.

¹⁹Mbakpenev Ou vea lu uma; akom a am kpaa aa nder. Nder nen, wa nen icam, ne mba ne tem shin vuulevu; gadia avure a Ou ka avure a iwanger je, man tar kpaa ua due a ujijingi mba mbakpenev.

²⁰Va nen, ior Av, nyôr nen ken ayou a en, wuhe nen ihinda kera cii, yer nen kpeghee, zan zan iyugh i̱ kar kera.

²¹Gadia nenge, TER ngu duen hen ijiir Na sha u tsahan mba ve tem sha won sha afer a ve; tar kpaa ua tese awambe a i hee sha u yô, ua kera cir mba i woo sha u la ga.