Read tiv Yesaia 29 Bible Online

Yesaia 29 - tiv bible

Yesaia 29

¹Kwagh tser u ve Ariel, Ariel, gar henpe Davidi lu wa afo la! Seer inyom sha inyom, uiniongo ve̱ ningir,

²tsô Me er Ariel ican, mzungu man mliam vea lu her; una hingir Mo er Ariel (atse) nahan.

³Me wa afo Me ningir we, Me tser, me kase u sha akumautya, Me wa u atô sha ikav mbi utyav.

⁴Nahan ú ôr kwagh shin atô u inyaagh, kwaghôron wou una due kur kur shin vuulevu, imo you ia due shin inya er i jijingi u orkpen nahan, man kwaghôron wou kpaa una due hiin hiin shin vuulevu.

⁵Kpa ikpila i mbaihomov ou la vea hingir er vuulevu u puer nahan, man ikpelaior i wan ipila kpaa er ka imough i i kar kera yô; kwagh ne una er fefa, á bur a bur je.

⁶TER u akum a Sha Una va sôr u sha idyuran man mtenger u tar man iov i vesen man hiar man Ura u nôôn baver baver man nomborusu u hian akaa.

⁷Akuraior ikpila a a nenge ityav a Ariel la cii, mba ve kôndo sha a na kua sha gilgar na, mba ve tsule un, mba ve eren un ican la, vea hingir er ka mnyam ma cien yô, kwagh u i nenge a mi tugh nahan.

⁸Tsô aluer or u ijen i ker nan man mnyam ma cie nan er nan ngu yan kwagh, kpa nana nderen yô, nan ngu ijen her tsô, shin er or u imura i ker nan man mnyam ma cie nan er nan ngu man mngerem yô, kpa nana nderen yô, nan vôr man imura i kôr nan her, kape akuraior ikpela cii vea hingir la, mba ve nenge ityav a uwo u Shion la.

⁹Tile nen, i̱ kondo ne iyol, pir nen ashe, lu nen mbaapirashe! Ve hunde kpa ka sha wain ga, ve hingir zemba ze zemba kpa ka sha msôrom ma yuan ga.

¹⁰Gadia TER haa ne jijingi u mnyam ma mem mem, A pir ne ashe, ka uprofeti je la, man A cir ne ityouv, ka mbanengenakaa je la.

¹¹Mpase u sha akaa ne cii ngu ne er akaaôron a ken ruamabera u i cir un i ver ikav nahan, u ka i na orfantakerada er: Shi ôr kwagh ne; kpa una kaa er: Me fatyô ga, gadia i cir un i ver ikav sha mi;

¹²shi i na or u nan fe takerada ga ruamabera ne, er: Shi ôr kwagh ne; kpa a kaa er: M fa u ôron ga.

¹³Ter kaa er: Er ior ne ve kporom her a Mo sha zwa ve, man ve civir Mo sha ityumbujôôgh ve, kpa asema a ve gema gba ca a mo man mciem ma ve lu cian Mo kpaa ka tindi u ior u i tese ve a tese tsô,

¹⁴nahan yô, nenge, shi Me er tom u kpilighyol hen ior mban, ka tom u kpilighyol man u cieryol, kwaghfan u mbafankwagh vev una saa ishe, man mkav u mbakavenkwagh vev kpaa una yer kera.

¹⁵Kwagh á tser mba ve yeren TER mbamhen vev kpen kpen la, man aeren a ve kpaa a lu ken ime; mba kaan er: Ka an nan nengen a vese? Man ka an nan fe se?

¹⁶Nenge, mtsum wene! Ormaantyegh nana lu kwagh môm a inyaityuu, nahan kwagh u i er un, una kaa a u a er un la er: A erem ga, shin kwagh u a gbe un, una kaa a un u a gbe un la er: Ngu a mkav ga, kpa?

¹⁷Mase shin ciôn tsô, á gema Lebanon una hingir sule u atam a ikon a dedoo, man sule u atam a ikon a dedoo ua gema á hingir er ka ikô nahan gaa?

¹⁸Sha iyange la mbaakondoato vea ungwa akaaôron a ruamabera, man ashe a mbaapirashe kpaa, mba ve lu ken aôndoaimegh man ime, vea nenge kera.

¹⁹Mbaasemaleghlegh kpaa vea seer iember ve ken TER, man mbaatsanev ken ior kpaa vea ember ken Icighan u Iserael.

²⁰Gadia ipilaor nana hingir gbilinor, ornahantar nana kera lu sha won ga, man mba ve veren ishima sha iferkwagh i eren cii á tim ve kera;

²¹ve mba ve ne or ibo sha ishember kwagh i kwaghôron, man ve hôn to sha u kôron u a tem hen hundagar sha u ôron ijir sha mimi la, man ve mgbegha orperapera kera sha gbilinkwagh.

²²Nahan yô, TER u A yima Aberaham la, ngu kaan kwagh sha ya u Yakob la er: Yakob una kera va ahenge ga, ishigh nagh kpaa kia kera lu peng ga.

²³Gadia zum u un kua ônov nav vea nenge tom u ave Am ken atô ve yô, vea tsegha iti Yam; een, vea tsegha Icighan u Yakob, Aôndo u Iserael Una cier ve iyol.

²⁴Mba ve tsumen ken jijingi la vea zua a mkav, man shi mbagbanahon vea rumun ityesen.