Read tiv Yesaia 30 Bible Online

Yesaia 30 - tiv bible

Yesaia 30

¹Kwagh á tser ônov mba hendan kwagh, kape TER A kaa la; mba dughun mhen, kpa ka u a dugh hen a Mo ga; mba zuan zwa, kpa ka u sha Jijingi Wan ga, ka sha u vea seer isholibo sha isholibo yô;

²mba yemen senen shin Igipiti, kpa ve pine zwa Wam ga, sha u vea ker mwar ken agee a Farao man vea yer ken mure u Igipiti yô!

³Nahan yô, agee a Farao aa hingir kunya wen, man u yeren ken mure u Igipiti kpaa una hingir iheen yen.

⁴Gadia atiator a ve mba ken Soan man mbatyomov vev kpaa za ar ken Haneshi;

⁵ve cii ve va ahenge sha ci u ior mba ve fetyô u lun ve a ma inja ga la; ve kera lu ve a iwasen shin ma inja kpaa ga, saa kunya man iheen tseegh tsô.

⁶Mkaanem ma Aôndo sha ishôso i ken tar u Imbusutariyan la. Mba karen ken tar u ican man u nyian ishima, henpe ngôbegha man nombegha man igbinde man iyôusu i purugh ve dugh la; ve tôô inyarev sha ajime a agumajaki, man akaa a ve a injaa kpaa sha agundu a urakumi, ve yem hen ior igen i i lu ve a ma inja ga yô.

⁷Gadia iwasen i Igipiti ka i gbilinigh, ka i ikoogh kpaa ga, ka nahan man m yer un mer: Rahabi u a gbe teman tsô ye.

⁸Yem ase, za nger kwagh ne sha kpande sha ishigh vegh, shi nger un ken ruamabera kpaa, a̱ lu sha ci u ayange a ken hemen gbem sha won.

⁹Gadia ka ior i hendan kwagh je, ônov mba aiev, ônov mba ve rumun u ungwan ityesen i TER ga yô;

¹⁰ka ve kaa a mbanengenakaa la er: De nengen nen ga; man shi ve kaa a uprofeti kpaa er: De pasen nen akaa a mimi ga, ôr nen se akaa a doon se la pasen nen se akaa a icughugh;

¹¹undu nen gbenda, kaha nen sha ihange kera, na nen Icighan u Iserael A̱ ndiir se ashe.

¹²Nahan yô, Icighan u Iserael ngu kaan nahan er: Er ne laha kwaghôron ne, ne suur sha ipila man ayom, ne lian sha mi yô,

¹³nahan yô, iferkwagh shon ne ia hingir ne er ka kwe u kwagh u a sôôn u gban, u a nur sha gôgôkpekpe u m-osogh na ka a va fese, ian i kar ga yô.

¹⁴Una hembe un er ka i hembe ityegh ki ormaantyegh nahan, ki i hembe ki avur avur, mhôônom ma ker ga; je i kera zuan a ancenge ken avur a ki, sha u za tôôn usu sha mi ken atse, shin u kesen mngerem a mi shin ityumnger kpaa ga yô.

¹⁵Gadia Ter AÔNDO, Icighan u Iserael kaa nahan er: Ka sha u hiden shi memen man né war ye, ka sha mtem u bem bem man jighjigh u nan, agee a en aa lu ye.

¹⁶Kpa ne rumun ga, ne gema ne kaa ner: Ei, sé za ayem ayem sha anyinya, nahan nea yevese a yevese je; man shi: Sé henda anyinya a hemban ayem; nahan mbazendan ne ijime kpaa vea zenda fefa je.

¹⁷Ior dubu vea yevese sha mnande u or môm; sha mnande u ior itian yô, nea yevese, zan zan á undu ne er ka ityôgh ki i tim sha ityough ki uwoogh man er tuta kpaa sha igungu nahan.

¹⁸Kpa TER yô, Una kegh, sha u eren a ven dedoo, ka nahan man A kende iyol Na sha, sha u Una zungwe ne mhôônom ye; gadia TER, ka Aôndo u ôron ijir je; saan mba ve keghen Un la cii iyol!

¹⁹Gadia ne ior mba ne tem sha Shion ken Yerusalem, nea kera vaa ga; Una er a we dedoo kpee sha mliam ou; zum u Una ungwa yô, Una ver ato we.

²⁰Ter na ne bredi u bocan man mngerem ma icanem, nahan kpaa mbatesen ou vea kera yer ayol a ve ga, kpa ashe ou aa nenge a mbatesen ou;

²¹ato ou kpaa aa ungwa kwaghôron ken ijime you u kaan er: Ka gbenda je ne, za nen sha u, zum u á sar ne u geman ken iyan shin ken imese la yô.

²²Nea hôngor ieev you mbi gban a gba mbi i cir mbi azurfa iyol la, man ieev you mbi haan a haa mbi i cir mbi zenaria iyol la; wea haa mbi kera er kwagh u hôngorough nahan; wea kaa a mbi wer: Kar heen kera.

²³Tsô Una na ura sha ci u ivor you i lôôn ken sule, kua alakema u eren bredi a mi, ka iyiav mbi i zough a mi ken sule je la; mbia doo ken zwa, shi mbia taver or agee. Sha iyange la yô, uzendenya ou vea ya toho hen ijiir i yan toho i gbangese.

²⁴Abua man agumajaki a a kaha inya la aa ya kwaghyan u i we bar sha mi, u i peer un sha tser man i tsaan un sha lalia yô.

²⁵Sha hanma uwo u taven man sha hanma igungu u taven kpaa iwagh ia lu kua uikuwanmbamngerev, sha iyange i mwoo u vesen, zum u ugôgômbaayoughouv mba taven sha la vea yôhôl á gba la.

²⁶Shi iwanger i uweregh kpaa ia hingir er iwanger i iyange nahan, man iwanger i iyange kpaa ia seer iwanger kwa taankaruhar, er iwanger i ayange ataankarahar nahan, sha iyange i TER una kange mvihiyol u ior Nav la, man Una bee ve ivav i i gbidi ve la.

²⁷Nenge, ka ken ica, iti i TER i dugh ye, iyugh Na ngi hian, mnyim ma kôrkôr ma kôndon sha; ityumbuzwaagh Na mgbough a iyugh, man nombor Na ngu er usu u hian nahan;

²⁸iôôn Na ngi er uwagh u saren avenge, u mngerem ma ar iker iker yô, sha u tsaan akuraior sha lalia u mtim; man lijam u ka a goom a yem ken mtsum ngu akuraior ken azegher.

²⁹Nea wa icam er ka i eren icighaniniongo tugh nahan, man iember kpaa ia lu ne ken ishima er or ka nan zenden sha korough ku tôngon nan vaan sha uwo u TER, hen Vande u Iserael yô.

³⁰TER Una na á ungwa imo Na i icivirigh, man Una tese mshir u uwegh Nagh, a iyugh Na i vesen man a nomborusu u hian, a ahumbe a hiar man uraahumbe man awombo.

³¹Gadia sha imo i TER, Ashiria una cia sulugha, Una gbidye un sha gbough Nagh.

³²Hanma mgbidye u sha aga u a ver sha ci na, u TER A shir sha a na yô, una lu a iember i sha agbande a kuhwan man umolo; sha uwegh ku jingir ken utya, Una ta num sha a ve.

³³Gadia i vande sôron Tofeti ngise je; i sôr un sha ci u utor kpaa; A er un a za man a gbanger kuma sha ci u usu man ikon kpishi je; iôôn i TER ngi er ka ikuwan i sulfur nahan, ngi tsaren un.