Read tiv Yesaia 34 Bible Online

Yesaia 34 - tiv bible

Yesaia 34

¹Kporom nen akuraior sha u ne ungwa, ver nen ato ne ior; tar u̱ ungwa, kua m-iv u u, tar sha won cii kua akaa a a dugh sha mi cii.

²Gadia TER ngu yuwen akuraior cii, ishima ngi vihin Un a akum a ve cii, A tim ve puru, A na ve sha u i̱ sôngo ve.

³Ior vev mba i woo ve la, á haa ve kera, ihuma i akom a ve ia kpurum, man iwo ia sough sha awambe a ve.

⁴Akum a Sha aa saa kera, Usha kpaa á hule ve er ihurenruamabera nahan; akum a ve cii kpaa aa haa inya, er kwa u kon u wain ka u gba inya nahan, man er kon u tur ka u ndoor ika nahan.

⁵Gadia sanker Wam ma je hunde Sha, nenge ngu senen, una va ta sha Edom, sha u ôron ior ijir mba M we ve ifan Mer, i̱ tim ve kera la.

⁶Sanker u TER iv a awambe, engem iyol sha ahôm, sha awambe a agumaiyôngo man a ivo, sha ahôm a ahi a anomaiyôngo; gadia TER ngu a nagh ku sôngon ken Bosera, á sôngo kwagh ken tar u Edom je falegh á gba.

⁷Iyar ia gba a ve imôngo kua agumabua a anomabua imôngo; tar ve ua hunde sha awambe, vuulevu ve kpaa hingir shou shou sha ahôm.

⁸Gadia ka iyange i oron iyev i TER je la, ka inyom i oron iyev sha mhendan u i hendan a Shion la.

⁹Á gema iwagh na ia hingir mningem ma ilim, vuulevu na kpaa ua hingir sulfur, tar na kpaa ua hingir mningem ma ilim ma hian.

¹⁰Tugh man tetan ua pir ga; mnyim ma u maa zer kôndon gbem; ua hingir ice sha ikov ikov; ma or kpaa nana kera kar sha u sha won ga.

¹¹Kpa akumedu man adendem vea ngohol u, ivungu man gugôô kpaa vea tema ken u; Una ta kor u karen kwagh a mi u nzughul man kor u sôron kwagh a min sha u a̱ lu jighilaa yô, u gbilinigh sha u.

¹²Ashagbaior a na la, or môm u yôôn ve tartor ker, nana kera lu ga; atiator a u cii kpaa aa gba kwagh ga.

¹³Usaa vea mende ken ayou a na a tor kua usukungwagh man usagher kpaa ken ayou a na a utya, á hingir ikpur i ugbaseela, man ijiir i ukonkofi.

¹⁴Mbaanyamazenga vea zua a acire, ujijingi mba ken toho vea kohol anngôôv vev; jijingiutu una tema her, una zua a ijiir i memen.

¹⁵Heera yô, iyô i tsuwen ia wa ya, ia ta aji, ia tsev man ia kohol ônov shin mure her; heera yô, icoghol ia kohol, hanmô a ugen.

¹⁶Ker nen ken ruamabera u TER, ôr nen! Mô môm ken akaa ne una ban ga, hanmô una de zuan a ugen ga; gadia ka zwa Na u we tindi ye, man ka Jijingi Na A kohol ve A ver her ye.

¹⁷Ka Un je A er ve ishor ye, ka uwegh Nagh ku kar ve kwar ye; vea tema her gbem, vea tsa her sha ikov ikov cii.