Read tiv Yesaia 36 Bible Online

Yesaia 36 - tiv bible

Yesaia 36

¹Tsô sha inyom i sha pue kar unyiin i tor Hesekia la yô, Senakeribi tor u Ashiria kôndo sha u nôngon ityav a agar a Yuda a lun a ugir cii, a ngohol a kpaa.

²Nahan tor u Ashiria tindi Rabeshake u hen Lakishi er a̱ za hen Yerusalem hen tor Hesekia a ikumutya i ngeen. Tsô a za tile hen akpa u ityungumnger u sha, sha kômgbenda u hen ijiir i kungun akondo la.

³Nahan Eliakim wan u Hilkia, orvesen u nengen sha ya u tor man Shebena orngeren man Yoa wan u Asav or u ngeren abaver ken takerada la, ve due ve va her a na.

⁴Nahan Rabeshake kaa a ve er: Kaa nen Hesekia ner, zegetor, tor u Ashiria, a kaa er: Ka nyi agee u suur sha mi nee?

⁵U ngu fan wer, kwaghôron u sha zwa tseegh ka mfe kua agee a nôngon ityav a mini? Ka sha an je u suur, ve u hendan a moo?

⁶Nenge, u ngu suur sha Igipiti ishombongbo u iyia ne, ku or nana lian sha mi yô, kua nyôr nan ken ikevwe, kua kuma nan tsula; kape Farao tor u Igipiti a lu hen mba ve suur sha a na cii je la.

⁷Kpa aluer u kaam wer: Se mba suur sha TER, Aôndo wase, yô, kera ka Un shon u Hesekia lu vihi ajiir a Na a taven sha man atse a Na a nanden nagh sha mi kera, shi a kaa a Yuda man Yerusalem er: Gure civir nen sha ishigh ki atse ne, gaa?

⁸Yô, ta ase hwande a terem tor u Ashiria: mo yô, me na u anyinya dubu uhar, aluer wea fatyô u nan mbahendan a yô.

⁹Ú er nan man ú hemba gomna môm u a lu u hemban gban ijime cii ken mbayev mba terem la, ityava? U gema u gba suur sha Igipiti sha u zuan a akeke kua mbaanyinyav tsôô!

¹⁰Kera ka sha mrumun u TER je man m kende sha tar ne sha u va timin u gaa? Ka TER je A kaa a mo er: Kôndo, za nôngo ityav a tar la, tim u, ye.

¹¹Tsô maa Eliakim man Shebena man Yoa ve kaa a Rabeshake er: Ma u shi er kwagh a mbayev ou ken zwa u Shiria, gadia se mba ongo u, kpa de kera er kwagh a vese ken zwa u Yuda sha ato a ior mba ve lu sha gilgar ne ga.

¹²Kpa Rabeshake kaa er: Terem tindi er m̱ va ôr kwagh a ter wen kua ne tseegh tsôô? Kera ka hen ior mba ve tem sha gilgar a tindim sha u vea ya akôngo a ve man vea ma mnyandem vem a ven imôngo gaa?

¹³Tsô Rabeshake tile genger imo taver taver ken zwa u Mbayuda, kaa er: Ungwa nen kwaghôron u zegetor, tor u Ashiria!

¹⁴Tor ngu kaan nahan er: Hesekia a̱ de kera tsughun ne ga, gadia una fatyô u yiman ne ga;

¹⁵shi de rumun nen ner Hesekia a̱ gema ne ne̱ suur sha TER ga, er a kaan er: TER Una yima se kpee je, á na gar ne sha ikev i tor u Ashiria ga, la.

¹⁶De ongo nen kwaghôron u Hesekia ga, gadia tor u Ashiria ngu kaan nahan er: Lu nen bem a mo, due, va nen her a mo, hanmô wen nana ya atam a kon u wain u nan, man hanmô wen kpaa nana ya tur u nan, hanmô wen nana ma mngerem ma shin ijôr i nan kpaa;

¹⁷zan zan me kar van, me va kua a ven, me za a ven ken tar ugen u u lu er tar wen nahan, tar u uyia man u zar u wain, tar u ruam man u ishule i ikon i wain.

¹⁸Hesekia a̱ de kera tsughun ne kaan er: TER Una yima se, ga. Mbaaôndo mba akuraior cii, môm tsô u a yem tar na sha ikev i tor u Ashiria ngu kpa?

¹⁹Mbaaôndo mba Hamati man mba Arpadi mba hana? Mbaaôndo mba Sefarvaim mba hana? Ve yima Samaria sha ikev yam kpa?

²⁰Mbaaôndo mba ityar ne cii ka hanmô je a yem tar na sha ikev yam, ve TER Una yima Yerusalem sha ikev yama?

²¹Kpa ve huan ving, ve bugh zwa a na sha kwagh môm ga, gadia tor kaa er: De bughun nen zwa a na ga.

²²Tsô Eliakim wan u Hilkia u a nengen sha ya u tor man Shebena orngeren man Yoa wan u Asav or u ngeren abaver ken takerada, ve va hen Hesekia a akondo a ve a anden iyol, ve ôr un mkaanem ma Rabeshake la.