Read tiv Yesaia 42 Bible Online

Yesaia 42 - tiv bible

Yesaia 42

¹Nenge Wanakiriki Wam u M tuur Un; icuwan Wam u ishima i doom a Na yum yô; M ver Jijingi wam sha a Na, Una va a ijirôron i mimi hen akuraior.

²Una genger imo ga, Una er ikenge ga; Una na, á ungwa imo Na sha gbenda kpaa ga.

³Ijinga i hemben Una sombo i ga, mou u imenger u yughur mnyim la kpaa Una pir un ga; Una va a ijirôron sha mimi kpaa.

⁴Una gba ikure ga, á sombo Un kpaa ga, zan zan Una kar veren ijirôron i mimi sha won, ityar i hen kpezegemnger kpaa ia kegh ityesen Na.

⁵TER, Aôndo u A gbe Usha man A naregh ve, u A samber tar a akaa a a dugh sha u la, u A ne ior mba ve lu sha u la, iôôn, man shi A ne mba ve zenden sha u, jijingi kpaa yô, ngu kaan nahan er:

⁶Mo TER, M yila U sha perapera, M kôr u Uwegh, M kura U kpaa; M gema U, U hingir ikuryan i ior man iwanger i akuraior,

⁷sha u bughun mbaapirashe ashe, u dughun mbakwarev agbe, man u dughun mba ken gaadi ken ime kera.

⁸Ka Mo TER, ka iti Yam je ne; icivir Yam kpaa Me na orgen ga, iwuese Yam Me na ieev mbi gban a gba la ga.

⁹Nenge, akaa a ngise la, a er kera ve, ka akaa a he M lu tesen ye; M ngu ôron ne kwagh u a, er a lu a due ga je yô.

¹⁰Wa nen TER icam i he, iwuese Na i̱ hii sha ikighir i tar je, ne mba ne zenden sha zegemnger man akaa a a lu shimi cii kpaa; man ne ityar i hen kpezegemnger kua mba ve tem sha i.

¹¹Desereti man agar a keregh ve̱ genger imo, angarev mba Kedar a tem kimi la kpaa; mba ve tem ken Sela, ve̱ wa icam, ve̱ er akenge sha ityouv mbi iwoov.

¹²Ve̱ na TER icivir, ve̱ pase iwuese Na ken ityar i hen kpezegemnger.

¹³TER Una due er or u ageegh nahan, Una mough sha kume er ornôngontyav nahan, Una genger imo, een, Una er ikenge, Una tese mbaihomov Nav tahav Nav.

¹⁴M huan gbang, M lu ving, M wa ishima gbong gbong; ahegen yô, Me ngor er kwase u toghor mar yô, Me ôô taver taver kua fegh fegh icin i môm.

¹⁵Me er iwo kua agungu vea hingir caveraa, Me er ahu a ve cii aa uma; Me er uifi vea uma; á hingir tar; Me er atungu kpaa, á uma.

¹⁶Shi Me va a mbaapirashe sha gbenda u ve fe u ga yô; ka sha igbenda i ve fe i ga je, Me kar a ve ye; Me gema ime ia hingir iwanger sha ishiv vev; ajiir a lun gbeen gbe gbeen aa hingir vaanaa. Akaa ne yô, Me er a, Me de a ga.

¹⁷Vea hide ijime, vea va ahenge tsung, ve mba ve suur sha ieev mbi gban a gba, mba ve kaan a ieev mbi keren a ker er: Ka ne, ne lu mbaaôndo asev la.

¹⁸Ne mbakondonato, ungwa nen, ne mbaapirashe, kenger nen, sha er né nenge yô.

¹⁹Ka an nan pir ashe, saa wanakiriki Wam la man ato kpaa a kondo nan er ortyom Wam u M tindi la nahana? Ka an nan pir ashe er or u M tsegh nan la shi nan pir ashe er wanakiriki u TER nahana?

²⁰U nenge a akaa kpishi, kpa u ver ishima ga, ato ou lu ivegher je, kpa u ungwa ga.

²¹Doo TER u kenden ityesen sha, hingir kwagh u icivirigh sha ci u perapera Na.

²²Kpa ior mban ka mba i num ve gbenda, i sar ve; ve cii i mande ve agbe, i wuhe ve ken ugaadi; ve hingir ishar, ma or u yiman lu ga; i kura ve er ishar i yan nahan, ma or u kaan er: Hide a mi kpaa, lu ga.

²³Ka hanmô wen je nan veren ato sha akaa nee, man nan we iko, nan ongo sha ci u ayange a a ve laa?

²⁴Ka an nan ne Yakob a hingir ishar, man nan ne Iserael sha ikev i mbanumungbenda? Kera ka TER, u se er Un isholibo la gaa? Un u ve venda u zenden sha igbenda Na, ve hemba ato sha ityesen Na kpaa.

²⁵Ka nahan man A haa ve iyugh Na i vihin tsung kua tahav mbu utya ye; i gba nanden ve sha usu, usu kase ve wa atô, nahan kpaa ve fa ga; hia ve kpaa, kpa ve wa iko ga.