Read tiv Yesaia 45 Bible Online

Yesaia 45 - tiv bible

Yesaia 45

¹TER ngu kaan a or Na u i shigh un mkurem, ka Shirushi je la, u M ker un sha uwegh ku yanegh, sha u Me ta akuraior inya sha ishigh nagh, man Me sagh utor ikange shin iwenge kera, shi Me bugh ihinda sha ishigh nagh, á kera wuhe ihindagar kpaa ga,

²Me hemen we, Me gema ajiir a gbeen gbe gbeen la aa hingir vaanaa; Me hembe ihinda i togula, man Me tôndo uishindan mba iyôôv kera;

³Me na u akaa a injaa a ken ime man akaa a injaa a i yer a ken ajiir a myer, sha u ú fa er Mo M lu TER, u M yer u sha iti You yô, Mo Aôndo u Iserael.

⁴Ka sha ci u Yakob wanakiriki Wam man Iserael icuwan Wam, M yer sha iti you ye, M seer u iti i icivirigh, shin er u vande fan Mo ga nahan kpaa.

⁵Mo M ngu TER, mô ugen ngu ga; ma aôndo ugen ngu ga saa Mo; M ta u ikondo uya shin er u fem ga nahan kpaa;

⁶sha u I̱ fa, hii sha mdugh u iyange je zan zan mmir u i, mô ugen ngu ga saa Mo; ka Mo M lu TER ye, mô ugen ngu ga.

⁷M ver iwanger, man shi M gba ime; M va a kwaghdoon man kwaghvihin kpaa, ka Mo TER M er akaa ne cii ye.

⁸Ne usha, haa nen aber shin inya, abeen kpaa A̱ nôô perapera shin inya, tar u̱ bugh, myom a̱ due, perapera a̱ mende nongo; gadia ka Mo TER M gbe u ye.

⁹Kwagh á tser un u a hendan a, u A maa un la, icenge i ken atsenge a hen inya! Inyatyuu ia kaa a or u maan i er: Ka nyi u erenee? Shin tom wou ua kaa er: Ngu a ave ga, kpa?

¹⁰Kwagh á tser un u a kaa a ter er: Ka nyi u mara? Shin a kwase er: Ka nyi u toghol mara?

¹¹TER, Icighan u Iserael, u A maa un la, ngu kaan nahan er: Pinem kwagh u akaa a aa va er ken hemen la; ônov Av kua tom u ave Am yô, de ve, ve̱ lu sha ikev Yam tsô.

¹²Ka Mo je M er tar ye, M gba or, M ver nan sha u kpaa; ka ave Am je, a samber Usha, akum a ve la cii kpaa, M wa a atindi.

¹³Mo M mough a na sha ken perapera, Me sôr igbenda na cii, una maa gar Wam, man ka un je una pase mbakwarev Av kpaa ye, á lu sha inyar ga man sha iwua kpaa ga, kape TER u akum a Sha A kaa la.

¹⁴TER ngu kaan nahan er: Iwengeoron i Igipiti, man ikav mbi kasuav mbi Etiopia kua Mbasabea, ugôgômbaiorov la, vea per vea va her a we, vea hingir mba ou kpaa, vea dondo u ijime, vea per ken a we a mshirim iyol, vea gule sha ishigh you, vea zamber a we er: Mimi je, ka hen a we tseegh Aôndo A lu ye, mô ugen ngu ga, Aôndo ugen ngu ga.

¹⁵Mimi je, U ngu Aôndo u U yer iyol You, Aôndo u Iserael, Oryiman.

¹⁶Kunya kôr ve, ve cii ve va ahenge; ve yem a iheen iyol imôngo, ve mba ve gbe eev la.

¹⁷Kpa Iserael yô, TER Una yima ve, sha myom u tsôron; kunya ua kôr ne ga, né va ahenge sha won kpaa ga.

¹⁸Gadia kape TER A kaa ne, Un u A gbe Usha—ka Un man A lu Aôndo ye—u A maa tar man A er u kpaa la, ka Un A ver u ye; A gba u er u̱ lu gbilin dang ga, A maa u sha er ior ve̱ tema sha u: Ka Mo M lu TER ye, mô ugen ngu ga.

¹⁹M ôr kwagh ken myer, shin ken ma ijiir ken tar u imegh kpaa ga; M kaa a tsombor u Yakob Mer: Gba keren nen Mo gbilin tsô ga; Mo TER M er kwagh u perapera, M pasen akaa a a lu vough.

²⁰Kohol nen ayol a en va nen; kporom nen imôngo, ne mba ne wer ken akuraior. Ve mba a mfe ga, ve mba ve tee ieev vev mbi i gbe mbi sha kon la, man mba ve eren msen, ve sen aôndo u a fetyô u yiman ga la.

²¹Pase nen, due nen a mi; ve̱ hen kwagh ayol a ve: Ka anti nan tese kwagh ne, hii sha ayange a tsuaa la je? Ka anti nan pase kwagh ne sha ayange a tsuaa la? Kera ka Mo TER gaa? Ma aôndo ugen kpaa ngu ga, saa Mo; Aôndo u jighilii man u yiman kpaa ngu ga, saa Mo.

²²Gema nen her a Mo, i̱ yima ne, ne akighir a tar cii; gadia M ngu Aôndo, mô ugen kpaa ngu ga.

²³M bum iyol Yam je, kwaghperapera due sha zwa Wam, kwaghôron u una kera hide ga yô, M kaa Mer: Ka Mo je, hanma inyu ia gulem inya, man hanma nombor kpaa ua bum ye.

²⁴Ka ken TER tseegh, kape á ôr kwagh sha a Mo la er, perapera kua agee a lu ye; ka her a Na je ior vea va ye; kpa mba asema a vihi ve a Na cii, kunya ua kôr ve.

²⁵Ka ken TER tsombor u Iserael cii ua zua a perapera, ua ta ihagh kpaa ye.