Read tiv Yesaia 48 Bible Online

Yesaia 48 - tiv bible

Yesaia 48

¹Ungwa nen kwagh ne, we ya u Yakob, ne mba ne yer ayol a en sha iti i Iserael yô, man ne dugh ken mngerem ma Yuda, ne mba ne bumun iti i TER, man ne teren Aôndo u Iserael, kpa i lu sha mimi ga, shin sha perapera kpaa ga.

²Gadia mba yer ayol a ve er, ior i icighangar, ve suur sha Aôndo u Iserael, TER u akum a Sha, ka iti Na je la.

³Akaa a tsuaa la, M tsenga pasen a je, ka ken zwa Wam a dugh ye, M tese a, M kure a fese je, a er kera kpaa.

⁴Gadia M fa, u taver ityough, mon wou ka gbelaiyôgh, man icul you ka togula je;

⁵Ka nahan M tsengapasen we akaa ne ngise ye, er lu a kuma ga je, M tese u a, sha u we de va kaan wer: Ka eev av mbu er a, ga; shin eev av mbu gban a gba, shin eev av mbu keren a ker mbu ve a a kpaa, ga.

⁶U vande ungwan akaa ne; yô, kenger ase akaa ne cii; nahan ne kpaa, ne kera pase akaa ne gaa? Hii hegen je zan zan, Me tese u akaa a he, akaa a ken myer, a u vande fan a ga yô.

⁷I gba a hegen, ka ngise ga; er i lu a kuma sha iyange ngin ga yô, u vande ungwan kwagh u a je ga; sha u we de va kaan wer: Nenge, m vande fan a, ga.

⁸Een, u ungwa ga; een, u fa ga; een, ato ou vande bughun tsuaa kpaa ga; gadia M fa er u eren kwagh sha atseregh yum yô, i yila u er, orhendankwagh, er u lu ken uya je.

⁹Sha ci u iti Yam yô, Me ngôôr a iyugh Yam, sha ci u iwuese Yam yô, Me wa ishima a we, Me tim u ga.

¹⁰Nenge, M wanger we, kpa ka er azurfa nahan ga; M kar u ken atse a usu u ican.

¹¹Ka sha ci Wam iyol Yam, ka sha ci Wam iyol Yam, Me er kwagh ne ye, gadia á er nan man Me rumun Mer, i̱ hôngor a iti Yama? Icivir Yam kpaa Me na orgen ga.

¹²Ver ato her a Mo, we Yakob, man Iserael u M yila u; ka Mo je ne; Mo M ngu u hiihii, shi M ngu u masetyô kpaa.

¹³Ka uwegh Agh je ku tim imagh ki taregh ye; uwegh Agh ku yanegh samber Usha; zum u ka Mea yila ve yô, ve mough ve tile sha imôngo.

¹⁴Kohol nen imôngo, ne cii, ver nen ato; ka anti ker a ven nan pase akaa angara? Un u a doo TER ishima la, una er ishima na sha Babilon, man uwegh nagh kpaa kua lu sha Mbakaldi.

¹⁵Mo, Mo, M ôr kwagh, een, Mo M yila un; Ka Mo M ve a na ye; ikôr ia lagh un sha gbenda na kpaa.

¹⁶Kporom nen her a Mo, ungwa nen kwagh ne: sha hiihii je M ôr kwagh ken myer ga; zum u kuma u kwagh la una er yô, Mo M lu heregh je; hegen Ter AÔNDO tindim kua Jijingi Na.

¹⁷TER Orpaan wou, Icighan u Iserael, ngu kaan nahan er: Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zende sha mi la.

¹⁸Ma u ver ato sha atindi Am, tsô bem wou ma a lu er ifi nahan, man shi perapera wou kpaa ma a lu er agôndo a zegemnger nahan,

¹⁹man shi tsombor wou ma u lu er waarawa nahan, man ônov mba iyav ou kpaa er ka sam u waarawa yô; ma i gber iti na kera ga, ma i tim i sha ishigh Yagh kera kpaa ga.

²⁰Due nen ken Babilon kera, yevese nen Mbakaldi; pase nen sha imo i icam je, kaa nen kwagh ne, yôô nen un zan zan ikighir i tar, kaa nen ner: TER paa wanakiriki Na Yakob.

²¹Imura kôr ve, zum u A hemen ve ken udeserti la, ga; A er mngerem due ken vande sha ci ve; A pav vande, tsô mngerem gba kuwan.

²²Ma bem kera ngu sha ci u aferaior ga, kape TER A kaa la.