Read tiv Yesaia 5 Bible Online

Yesaia 5 - tiv bible

Yesaia 5

¹Kam pe wan icam teren u a doom ishima la, icam i u a doom ishima la, sha sule na u wain. U a doom ishima la yan lu a sule u ikon i wain sha igungu u doon inya kpishi;

²a kaha u, a sange awen ken u kera, a lôô ikon i wain i hemban doon cii ker, a maa gôgôyou u taven her atô u u, man a time ihungwa i shoghol wain shimi, A ver ishima er ua ume atam a wain a dedoo, kpa u gema u ume atam a bo.

³Hegen yô, ne mba ne lu ken Yerusalem man ior mba Yuda, shi ôrom nen ase ijir, Mo vea sule wam u wain.

⁴Ka nyi i shi, i ma M er ken sule wam ve M er i ga? Er M ver ishima Mer ua ume atam a wain yô, er nan man u gem u um atam a bo?

⁵Hegen yô, Me pase ne kwagh u Me er a sule Wam u wain la: Me sough igyar i u kera, á ya u; Me hembe kpekpe u u kera, á ndyar u shin angahar;

⁶Me vihi u kera, á kera sôr u agbaa ga, á vughul u kpaa ga; kpa ua mende usaa kua sagher; Me ta abeen icin, á kera nôô ura sha u ga.

⁷Gayô, sule u wain u TER u akum a Sha ne, ka ya u Iserael je, ior mba Yuda kpaa ka mende u sha ishima Na je; A ver ishima sha ijirôron i mimi, kpa nenge, gema ka awambe a haan inya, man shi sha perapera, kpa nenge gema ka mliam.

⁸Kwagh á tser mba ve seer ya sha ya ve, mba ve seer sule sha sule ve, je zan zan ma ijiir i kera shi ga, man ne mase teman hen atô u tar ne, ne tseegh.

⁹TER u akum a Sha kaa, sha ato am je, er: Mimi je, uya kpishi vea hingir atse, mba kehen kua mba dedoo kpaa, or á kera tema ken ve ga.

¹⁰Gadia sule u wain u u lu indyor pue ua iv gbanggbang uhar tsô, man ikaren i ivor i homer môm (ka efa pue je la) ia va iv efa môm tseegh.

¹¹Kwagh á tser mba ve moughon pepe sha u zendan msôrom ma yuwan ityô, mba ve tema tugh zan zan wain a nzughul a ve la!

¹²Ve mba a adiguve man molo man genga man imar kua wain hen uiniongo vev la, kpa aeren a TER yô, ve wa a iko ga, man tom u ave Na kpaa mba nengen a mi ga.

¹³Ka nahan man ior Av ve lu nyôron ken uikangen ye, sha ci u mfe a ban yô; ashagbaior a ve hingir mbajenev, man ikpilaior ve ngi kpen imura.

¹⁴Ka nahan man Sheol a seer isharen na, a aver zwa gbanger gande, nahan icivir ve man ikpilaior ve man ayôôso a ve kua or u nan ember ken a ve, mba hungwan shimi.

¹⁵Kape uuma ve hingir dang man or nan hee la, ashe a mbagengeseyol kpaa á hee a;

¹⁶kpa TER u akum a Sha yô, á kende Un sha sha ijirôron i mimi, man Aôndo u wang tsegha iyol Na sha perapera.

¹⁷Tsô aniyôngov vea gba yan toho ker er ka hen ijiir ve i yan toho yô, man mba azende azende vea ya atse a mbanyarev.

¹⁸Kwagh á tser mba ve udugh ifer sha ikor i aiegh man isholibo kpaa er ka sha kor u ikyekye i kpelan yô;

¹⁹mba ve kaan er: A̱ er ase fefa, A̱ torough a tom, Na, sé nenge; awashima u Icighan u Iserael la, a̱ nangem, a̱ va, sha u se̱ fa un yô!

²⁰Kwagh á tser mba ve yer ifer er, kwagh u dedoo, man kwagh u dedoo yô, ve gem ve yer er ifer la; mba ve gem ime i̱ hingir iwanger, shi ve gem iwanger i̱ hingir ve ime la; man ve ver myough er ka mnyohom, man mnyohom di er ka myough la!

²¹Kwagh á tser mba ve nengen ayol a ve er ve mba mbafankwagh, man shi ve nengen ayol a ve er ve mba mbakavenkwagh yô!

²²Kwagh á tser mba ve taver ayol sha wain u man, man ve lu mbaageev sha u nungwan msôrom ma yuwan la;

²³mba ve ne mbalun a ibo ishô sha ci u inyar, kpa orperapera yô, ve ngohol mimi u nan kera!

²⁴Nahan yô, er nomborusu ka u hia atôayia man er toho u uman kpaa ka u haa inya sha usu, kape mise ve ua vôngo la, imondon ve kpaa una mough er ihundu yô, gadia ve venda ityesen i TER u akum a Sha, ve laha kwaghôron u Icighan u Iserael la.

²⁵Ka nahan man iyugh i TER i kende sha ior Nav ye, man shi A naregh uwegh Nagh sha u eren num a ve; A tsaha ve, iwo kpaa tenger, man akom a ve hingir er ihôghonov nahan ker atô u akômaigbinda. Nahan kpaa iyugh Na ngi a kar kera ga, kpa uwegh Nagh ku naregh ku di her tsô.

²⁶Man shi Una kende tuta sha, sha ci u ikurior i caa je, Una yila i sha hondo u tôngon sha ikighir i tar je; tsô ia va ayem gagh je.

²⁷Mô ve môm nana vôr shin nana nôngo gbeev ken a ve ga, mô môm kpaa nana meer mnyam shin nana yav kpaa ga; kwange u iwenge ve kpaa ua sagh ga, kwange u akôvangahar a ve kpaa ua tôndo ga;

²⁸avaan a ve ka a horon, mbaada vev cii kpaa i henda ve; apande a anyinya ve kpaa aa lu er iwen i gberusu nahan, akaver a ve kpaa nga er ahumbe a hiar yô;

²⁹kume ve ngu er ngôbegha yô, vea ta kume er agumabegha yô; een, vea kpela iker, vea tsuwe vea kôr inyam, vea kpela i vea yem a mi doo doo kpaa, ma or u yiman i nana lu ga.

³⁰Sha iyange la ahura á ta sha a ve er ihuran i zegemnger nahan; aluer or nana nenge shin tar yô, nana nenge a ime i ican, iwanger ia hingir ime sha ci u abeen.