Read tiv Yesaia 56 Bible Online

Yesaia 56 - tiv bible

Yesaia 56

¹TER ngu kaan nahan er: Waan nen ijirôron iko, eren nen perapera; gadia myom Wam mgbôghom u van kua perapera Wam kpaa, sha u á pase un.

²Saan or u nan eren nahan la, iyol, man wan u or u nan taver ishima sha mi la, u nan kor iyange i memen sha u hôngor i ga, man nan ze uwegh sha u eren ma kwaghbo kpaa ga yô.

³Man or u ken nongo ugen u nan nyer nongo a TER kpaa, nana̱ de kaan er mimi je TER una pavem a ior Nav, ga; man or u nan lu icôngonor kpaa, nana̱ de kaan er: Nenge, mo kon u ombor m ngun ne, ga.

⁴Gadia TER ngu kaan sha kwagh u mba i tsenge ve ve hingir uicôngonmbaiorov la, mba ve kor ayange a memen am, man mba ve tsough akaa a doon Mo, ve taver ishima sha ikuryan Yam kpaa la, er:

⁵Ka ken iyou Yam man ken atô u ukpekpe Av Me ver ve ikav i umbur ve, man iti i i hembe doon a ônov mba nomso kua mba kasev kpaa ye; Me na ve icôronti u una bee mayange ga yô.

⁶Man ior mba ken nongo ugen, mba ve nyer nongo a TER sha u vea er Un tom man sha u iti i TER ia doo ve ishima man sha u vea lu mbatomov Nav kpaa, hanmô u nan kor iyange i memen sha u hôngor i ga, man nan taver ishima sha ikuryan Yam yô,

⁷Me va a ve hen icighanwo wam je, Me na, á saan ve iyol ken iyou Yam i msen, iniav vev mbi nanden man iniav vev mbi sôngon kpaa á rumun mbi sha atse Am a nanden nagh sha mi; gadia á yila iyou Yam er iyou i msen sha ci u akuraior cii.

⁸Ter AÔNDO u A kohol Iserael mba ve sambe la, ngu kaan er: Mbagenev kpaa Me kohol ve, á seer ve sha mba nav mba i vande kohol la.

⁹Ne inyamtoho cii, va ya nen! Een, ne inyam i ken ikô cii.

¹⁰Mbakuran nav cii ka mbaapirashe, ve cii mba a mfe ga, ve cii ka iwa i kondon aker je, ve fatyô u gbehen ga, mnyam ma cien ve, ve yaven inya, doo ve u meer mnyam.

¹¹Een, iwa i eren hua, mayange ngi fe iden ga; ve ka mbakuranilev mba ve fe u veren ishima sha kwagh ga yô; ve cii ve hurugh, hanmô ve ngu yemen gbenda u nan je, hanmô ve, hen mtsera u nan, ve cii mba kwagh môm tsô.

¹²Va nen (kape ve kaa la) me za va a wain, sé ma msôrom ma yuwan sé ide nen; kper kpaa á lu er nyian nahan, á lu iyange i vesen je, á gande.