Read tiv Yesaia 60 Bible Online

Yesaia 60 - tiv bible

Yesaia 60

¹Mough sha, ta iwanger; gadia iwanger you i va, iengem i TER kpaa ngi mondon sha a we.

²Gadia, nenge, ime ia cir tar, man angôghime kpaa una cir akuraior; kpa we yô, TER Una mondo iwanger sha a we, iengem Na kpaa á nenge a i sha we.

³Akuraior aa va hen iwanger you, utor kpaa vea va hen iwanger i i mondo sha a we la.

⁴Kende ashe, kenger hanma ian, nenge; ve cii mba kohol mba van her a we; ônov ou mba nomso mba moughon ken ica, van her a we, ônov ou mba kasev kpaa, mba van a ve sha ihan.

⁵Nahan wea nenge man ishigh you kia engem sha iember, ishima you ia tsuwe, ia bugh ia gbanger; gadia inyaregh ki zegemnger kia gema á va hen a we, man akaa a injaa a akuraior kpaa aa va her a we.

⁶Ikpela i urakumi ia cir u, agumarakumi a Midian kua Efa; ve cii vea due ken Sheba, vea va a zenaria kua kwagh u human doon, vea yôô aeren a TER a a kom iwuese la, saan saan.

⁷Akumauile a Kedar aa va kohol her a we cii, anomaiyôngo a Nebayoti aa er u tom, aa va, á va hingir nagh ku dedoo sha atse Am a nanden nagh sha mi, man Me civir iyou Yam i icivirigh la.

⁸Ka unô ne, ve purugh er ibeenegh nahan, man ve ve er mkungum hen ahura a ma nahana?

⁹Ityar i hen kpezegemnger ia keghem, utso mba Tarshishi kpaa vea hemen sha u tôôn ônov ou mba ken ica van a ve; mba van a azurfa ve kua zenaria ve a ve imôngo, sha ci u iti i TER, Aôndo wou man sha ci u Icighan u Iserael, gadia A civir we.

¹⁰Ior mba ken iniongo igen vea maa ugilgar ou, man utor vev vea er u tom; gadia sha ishima i nyoon Yam M gbidye u, kpa sha erdoo Wam M zungu u mhôônom.

¹¹Ihindagar you kpaa ia luun ivegher gbem, á wuhen i tugh shin tetan kpaa ga, sha u i̱ va u a akaa a injaa a akuraior, kua utor vev kpaa.

¹²Gadia ikurior vea tartor u ua er u tom ga yô, vea saa ishe, akuraior ngara á tim a purututu.

¹³Icivir i Lebanon ia va her a we, kon u fer man kon u pelane kua kon u ouki, i cii, sha ci u eren icighanjiir Wam hwe; Me gema ijiir Yam i veren angahar ia lu i icivirigh.

¹⁴Ônov mba ior mba ve er u ican yô, vea va her a we agurenu; man mba ve laha u cii, vea shalegh inya hen akevangahar a ou; vea yila u er: Gar u TER, Shion u Icighan u Iserael.

¹⁵Er ngise i ta u kera, i kôr u ihom, je ma or kera kar hen we ga, nahan Mo Me gema u, ú hingir kwagh u engem zan zan gbem, man shi kwagh u iember sha ikov ikov.

¹⁶Ú ma atumba a akuraior, man shi ú ambe atumba a utor, man ú fa er Mo TER, M lu Oryiman wou man Orpaan wou kpaa, Uageegh u Yakob.

¹⁷Me va a zenaria sha ityough ki togula, shi Me va a azurfa sha ityough ki iyôgh, togula sha ityough ki kon, iyôgh sha ityough ki awen. Me ver bem a̱ lu orkurantar wou man perapera a̱ lu ityoor wou.

¹⁸Mayange á kera ungwa iperakwagh ken tar wou ga, shin myôhôr shin mtim ken ipaventar wou kpaa ga; wea yila ugilgar ou wer Myom, man ihindagar you kpaa wer Iwuese.

¹⁹Iyange ia kera lu iwanger you atetan ga; shin mte u uwer kpaa una kera lu u iwanger you ga, kpa TER Una gema á lu iwanger you i tsôron man Aôndo wou kpaa Una lu icivir you.

²⁰Iyange you ia kera mire ga, uwer wou kpaa ua hide ijime ga, gadia TER Una lu iwanger you i tsôron; ayange a zungwen a ou kpaa aa bee.

²¹Ior ou cii vea hingir mbaperapera, vea tsôr yan dyako u tar la sha won, ka gbaa u M lee je la, tom u ave Am, sha u i̱ civir Mo yô.

²²U kiriki una hingir kweior, man u hemban ndahar una hingir ikurior i ageegh; Mo TER, Me er kwagh ne fefa zum u shighe á kuma yô.