Read tiv Yesaia 65 Bible Online

Yesaia 65 - tiv bible

Yesaia 65

¹M rumun u ungwan ve mba ve pinem ga la; M rumun Mer ve̱ zua a Mo, ve mba ngise ve kerem ga la; M kaa a ikurior i i yer sha iti Yam ga yô, Mer: M ngun heen ne, M ngun heen ne.

²M shi dughun ave didi sha ior mba hendan akaa, mba ve zenden sha gbenda u dedoo ga, sha mbamhen vev ayol a ve la;

³ior mba ve bamen Mo sha ishigh Yagh je, ve ne nagh ken ishule man ve nanden kwaghhumandoon sha akam la,

⁴mba ve tem her atô u iwaregh man ve tse ken ajiir a myer; mba ve ye inyamigo, man kwaghyan u nungwa nungwa u ndôhôrshima ngu ken ugbande vev;

⁵mba ve kaan er: Tile keela, de manger a mo ga, gayô i tsegham a tsegha je. Mban yô, kam mnyim ken ihinga je, usu u u shi hian didi.

⁶Nenge, i nger akaa ne sha ishigh Yagh je: Me huan ga, saa Me or iyev ve, een, Me haa ve injar ve sha ikum je

⁷Ka sha ci u aferakaa a en kua aferakaa a uter enev imôngo, kape TER A kaa la; er ve nande nagh sha iwo, man ve tohom sha agungu kpaa, nahan Me vande karen ve injar i tom ve, Me haa ve i sha ikum je.

⁸TER ngu kaan nahan er: Er wain u he ka a lu ken sumegh her nahan, man ugen nan kaa er: De vihin ku ga, gadia iveren ngi kimi, kape Me er sha ci u mbayev Av la, Me tim ve kera cii ga.

⁹Me er tsombor ua due ken Yakob, man ken Yuda kpaa, or u yan dyako u iwo Yam; uicuwan Av vea ngohol i man mbayev Av vea tema ker.

¹⁰Sharon una hingir ijiir i akumauile yan toho her, man pev u Akor kpaa una lu ijiir i akumabua yaven her, sha ci u ior Av mba ve keren Mo yô.

¹¹Kpa ne mba ne undu TER, ne hungul icighanwo Wam, ne ser tebul sha ci u Gadi (akombo a doon ikôr la) man ne toon wain u nungwan sha ci u Meni (akombo a vihin ikôr la) yô,

¹²Me ver ne sha ci u ishôm, né cii né ngurum sha u á sôngo ne; sha ci u zum u M yila la, ne vengese ga, zum u M ôr kwagh kpaa ne ungwa ga, kpa ne er kwaghbo sha ashe Am, ne tsuwa kwagh u a doom la ga yô.

¹³Nahan yô, Ter AÔNDO ngu kaan nahan er: Nenge, mbayev Av vea ya kwagh, kpa ne yô, nea lu ijen; nenge, mbayev Av vea ma kwagh, kpa ne yô, nea lu imura; nenge, mbayev Av Vea ember, kpa ne yô, kunya ua kôr ne;

¹⁴man nenge, mbayev Av, vea wa icam sha ci u iember ken ishima, kpa ne yô, nea vaa sha ci u ishima i vihin, nea gbire ivaa sha ci u mvihi u i vihi jijingi wen tsung la.

¹⁵Nea undu uicuwan Av iti yen la ia hingir ve kwagh u wan ifan a mi, Ter AÔNDO kpaa Una wua u kera; kpa mbayev Nav yô, Una ii ve iti igen kposo;

¹⁶sha u or u nan ver iyol i nan doo doo shin tar yô, nana ver iyol i nan ken Aôndo u mimi, man u nan bumun shin tar yô, nana bum Aôndo u mimi; sha ci u mbamzeyol mba tsuaa la hungul ve kera, i yer ashe Am ve je.

¹⁷Gadia, nenge, M ngu gban Usha u he man tar u he kpaa; á kera umbur akaa a tsuaa la ga, man shi aa kera va or ken ishima kpaa ga.

¹⁸Kpa lu nen saan saan, ember nen gbem sha kwagh u M lu gban yô; gadia, nenge, M ngu gban Yerusalem Mer, a̱ lu kwagh u iember, ior nav kpaa ve̱ lu saan saan.

¹⁹Me ember Yerusalem, man á saan Mo iyol a ior Av kpaa; á kera ungwa imo i mlia ken a na ga,

²⁰Hii sha shighe la je, wanikundan u lun ayange kpuaa nana kera lu ga, gadia wanye nana kpe er anyom a nan aa kuma deri nahan, man orsholibo kpaa ka u nan kom anyom deri la, ifan ia kôr nan ye.

²¹Vea maa uya man vea tema keregh, vea kaha ishule i ikon i wain, man vea ya atam a i.

²²Mayange vea maa ya, orgen á kar á tema ker ga, vea lôô, man orgen á kar á ya, ga; gadia er ayange a ikon a lu nahan kape ayange a ior Av kpaa aa lu la; uicuwan Av kpaa vea ya tom u ave ve zan zan je.

²³Vea kera er tom gbilin ga, vea kera mar ônov sha ci u ve̱ tim kera kpaa ga; gadia ve ka vor u mba TER A ver ve doo doo la, kua tsombor ve a ve imôngo kpaa.

²⁴Tsô er ve lu a yila ga kpaa, Me rumun, man er ve lu a kure kwaghôron ga je, tsô Me ungwa.

²⁵Gbaseela man waniyôngo vea ya toho imôngo, begha una ya toho er bua nahan, vuulevu ua lu kwaghyan u iyô. Vea kera er kwagh u vihin ga, shin vea tim kwagh sha icighanwo Wam cii mayange kpaa ga, kape TER A kaa la.