Read tiv Yesaia 66 Bible Online

Yesaia 66 - tiv bible

Yesaia 66

¹TER ngu kaan nahan er: Sha ka ikônough Yagh ki torough je, man tar ka ijiir Yam i pendan angahar sha mi; ka nyi iyou je nea maama? Man ka nyi ijiir je ia lum ijiir i memen heree?

²Gadia akaa angan cii ka uwegh Agh ku er a ye, ka nahan man akaa angan cii a va lu ye, kape TER A kaa la; imbaor i Me ver ishima sha a nan yô, ka u nan hide a iyol i nan ijime man nan lu a jijingi u vaan afanyô, shi nan gbidye ikarikase iyol sha kwaghôron Wam yô.

³Or u nan woo bua yô, nan ngu er or u nan woo or nahan; or u nan ne nagh ku sôngon sha tuleiyôngo yô, nan ngu er or u nan sombo aniwa mon yô; u nan ve a nagh ku sha samuyia yô, nan ngu er or u nan ve a nagh ku awambe a igogh nahan; man or u nan ve a kwaghhumandoon sha ci u nagh ku umbur yô, nan ngu er or u wuese akombo nahan. Er ve tsough igbenda i sha asema a ve, uma ve kpaa a ember sha akaa a ve a hôngorough nahan,

⁴Mo kpaa Me tsuwa akaa a zan ve iyol, man Me va ve a akaa a tan ve mciem iyol, sha ci u zum u M yila la, ma or nan vengese ga, zum u M ôr kwagh kpaa, ve ungwa ga; ve gema ve er kwagh u a lu u ifer sha ashe Am, man ve tsuwa kwagh u a doom ishima ga yô.

⁵Ungwa nen kwaghôron u TER, ne mba ne gbidi ikarikase iyol sha kwaghôron Na la! Anmgbianev enev, mba ve ker ne ihom, mba ve te ne kera sha ci u iti Yam yô, mba kaan er: TER A̱ tese ase icivir Na, se̱ nenge a iember yen! Kpa ka ve, vea va ahenge ye!

⁶Ikenge i ayôôso due ken gar, imo i ken tempel, imo i TER i oron mbaihomov Nav iyev yô.

⁷Er lu a toghor mar ga tsô, a mar je; er mnyoonom lu a kôr un ga tsô, a mar wan u nomso.

⁸Ka an nan vande ungwan imbakwagh nee? Ka an nan vande nengen ambaakaa shono? Á mar tar sha iyange i mômôô? Á mar ikurior icin i mômôô? Gadia er Shion hii er una toghor mar yô, a mar mbayev nav kera kpaa.

⁹Me va a na hen shighe u a kom u maren yô, man Me kera na er wan a̱ due gaa? Kape TER A kaa la. Mo u M ne mar, Me wuhe iyava? Kape Aôndo wou A kaa la.

¹⁰Lu nen sar sar a Yerusalem imôngo, ember nen un, ne mba a doo ne ishima cii; ember nen yagh yagh a na imôngo, ne mba ne zungu sha ci na cii;

¹¹sha er né ambe atumba a na a surun ishima, á kuma ne gbing gbing yô, sha er né kam atumba, man á doo ne ken ishima sha mngee u icivir na.

¹²Gadia TER ngu kaan nahan er: Me va un a bem er ifi ka a va nahan, kua icivir i akuraior kpaa er uwagh ka u sar avenge nahan; nea ambe, á ta ne sha ihan je, man á numbe a ven sha anu je.

¹³Er or u ngô u nan ka a sur nan ishima nahan, kape Mo kpaa Me sur ne asema la; á sur ne asema ken Yerusalem je.

¹⁴Nea nenge nahan, man ishima yen ia ember, akuhe a en aa hingir gese gese er gwergwer nahan, man á fa er uwegh ku TER ku lu a mbayev Nav yô, man Una yuwe a mbaihomov Nav.

¹⁵Gadia, nenge, TER Una va ken usu, man akekeautya a Na aa lu er ka hiar nahan je, Una pase ishima i nyoon Na sha iyugh, man mzehe Na sha igyamusu.

¹⁶Gadia TER Una ôr uuma cii ijir sha usu je, kua sha sanker kpaa; mba TER Una wua ve la kpaa vea ngee.

¹⁷Ve mba ve tsegh ayol a ve man ve wanger ayol a ve, ve dondo sha ugen u a lu ve her atô la sha u vea nyôr ken ishule yô, mba ve ye inyamigo man kwagh u hôngorough man ihyev la, vea saa nongo, kape TER A kaa la.

¹⁸Gadia M fa aeren a ve kua mbamhen vev; shighe ngu van u Me kohol akuraior cii kua ijô cii, vea va, vea va nenge icivir Yam.

¹⁹Me er kwagh u cieryol ker atô ve, man mba ve wer ken a ve kpaa, Me tindi ve hen akuraior, ka hen Tarshishi man Pul man Ludi, mba ve keren avaan sha ada la, man hen Tubal man Yavan, hen ityar i hen kpezegemnger i gban ca, i i lu a ungwa icivir Yam ga, man i lu a nenge iengem Yam kpaa ga la; tsô vea pase icivir Yam ken akuraior.

²⁰Vea va a anmgbianev enev cii ken akuraior cii, sha ci u nagh ku nan TER, sha anyinya man sha akeke a kpelan, man sha akaa a tôôn ior a mi, man sha mbaalfadari man sha urakumi, á va a ve hen icighanwo Wam Yerusalem, kape TER A kaa la, er Mbaiserael ka ve va a nagh shin tasa u wang, ken iyou i TER nahan.

²¹Uvev mbagenev Me ver upristi man Mbalevi, kape TER A kaa la.

²²Gadia er Sha u he man tar u he, mba Me er ve la, vea lu sha ishigh Yagh gbem nahan, kape vor wen man iti yen vea lu gbem je la, kape TER A kaa la.

²³Tsô hii sha uwer u he ne zan zan ar sha uwer u he ugen, man hii sha iyange i memen ne zan zan ar sha iyange i memen igen, uuma cii vea va gure sha ishigh Yagh, kape TER A kaa la.

²⁴Vea due vea za kenger akom a ior mba ve hendan a Mo la, gadia ijôô ve ia kpe ga, man usu ve kpa á pir u ga; vea hingir kwagh u ndôhôr uumace cii ishima.