Read tiv Yesaia 7 Bible Online

Yesaia 7 - tiv bible

Yesaia 7

¹Sha ayange a Ahashi wan u Yotam, wan u Ushia, tor u Yuda la, Reshin tor u Shiria man Peka wan u Remalia, tor u Iserael, ve kôndo sha Yerusalem sha u za nôngon ityav a na; kpa ve fatyô u nôngon ityav a na ga.

²I za kaa ya u Davidi er: Shiria sen va haa ken Eferaim, nahan ishima na tenger kua ishima i ior nav kpaa, er ikon i shin ikô ka i tenger nahan.

³Tsô TER kaa a Yesaia er: Due ase, we a wan wou Shear-Yashubi (Asande a a shi her la aa hide), za kegh nen Ahashi gbenda, hen ikighir i akpa u ityungumnger u sha, sha kômgbenda u zan hen ijir i i kungun akondo her la.

⁴Kaa a na wer: Ver ishima, ishima i̱ de nyian we ga; de kera cie ga, ishima i̱ de yen u sha ci u atôndo a usu a mnyiigh ahar ne ga, sha ci u iyugh i kenden tsung i Reshin man Shiria kua i wan u Remalia, la.

⁵Gadia er Shiria hen kwagh u bo sha a we, man Eferaim kua wan u Remalia, mba kaan er:

⁶Sé kôndo nen sha Yuda, sé ta nen un mciem iyol, sé hemba nen un, sé ver nen wan u Tabeel tor her atô na.

⁷Ter AÔNDO ngu kaan nahan er: Kwagh shon una lu nahan ga, una er nahan kpaa ga.

⁸Gadia ityough ki Shiria yô, ka Damaseku je, man ityough ki Damaseku yô, ka Reshin je. (Er anyom akunduatar kar ataan aa lu a kuma ga je tsô, á sombo Eferaim avur avur, sha er a̱ de kera luun ikurior ga yô.)

⁹Ityough ki Eferaim ka Samaria je, man ityough ki Samaria ka wan u Remalia je. Aluer nea na jighjigh ga yô, mimi je né tile dông ga.

¹⁰TER shi ôr kwagh a Ahashi, kaa er:

¹¹Pine ivande hen TER, Aôndo wou, i̱ lu shin, shin Sheol, shin sha, sha aôndo je.

¹²Kpa Ahashi kaa er: Me pine ga, me kar TER kpaa ga.

¹³Tsô a kaa er: Shi ungwa, we ya u Davidi, ka ne kwagh u kiriki u nan ior ivôron, je er ne na Aôndo wam kpaa Una vôr yôô?

¹⁴Nahan yô, TER iyol Na je, Una na ne ivande: Nenge, iniunkwase ia wa iyav ia mar wannomso, ia yila un iti er Imanuel.

¹⁵Una ya atumbabua a kôrough kua iyough, zum u una va fa u vendan kwagh u bo man u tsuwan kwagh u dedoo yô.

¹⁶Gadia er wanakiriki la una lu a fa u vendan kwagh u bo man u tsuwan kwagh u dedoo ga je tsô, tar u we u cie utor mba u, uhar mban, á undu u gbilin.

¹⁷TER Una va u, we a ior ou kua ya u teru, a ayange a alu avande van ga, hii sha iyange i Eferaim undu Yuda la je — ka tor u Ashiria je la!

¹⁸Sha iyange la TER Una tôngo hondo, Una yila iji i ken ca, ken akighir a iwagh i Igipiti, kua iyough i ken tar u Ashiria.

¹⁹Ia va, i cii, ia mem ken apev a iwoogh man ken ubarmbaawenev man sha usaa cii kua sha ajiir a adegh a toho a lu la.

²⁰Sha iyange la TER Una hondo sha atsem u i goho a goho un yande Ifi la, ka sha tor u Ashiria je la, Una hondo ice i sha ityo kua i shin angahar, indyer kpaa Una torough i kera.

²¹Tsô sha iyange la, or nana koso ngôbua môm man iyôngo ihiar,

²²nahan yô, sha ci u atumba a vea na kpishi la, nana ya atumba a kôrough; gadia ka atumba a kôrough kua iyough man hanmô u nan shi her hen tar la nana ya ye.

²³Tsô sha iyange la, hanma ijiir henpe ikon i wain ka i lu dubu man i kom u á yam i sha agbenger a azurfa dubu la, ia hingir ijiir i kôrakondo kua usaa.

²⁴Ka sha avaan kua ada man á va hen ijiir la ye; gadia tar la cii, ua hingir kôrakondo kua usaa.

²⁵Agungu cii a ngise i vughul a sha nduhar kpaa, wea mgbôghom a a ga, sha ci u cian kôrakondo kua usaa, kpa á hingir ijiir i zan a abua her, man i akusu a iyôngo á ndyaren her.