Read tiv Levitiku 16 Bible Online

Levitiku 16 - tiv bible

Levitiku 16

¹TER ôr kwagh a Mose ken masetyô u ku u ônov mba Aron mba uhar, mba ve kporom sha ishigh ki TER ve kpe la;

²tsô TER ôr kwagh a Mose er: Kaa a anngôu Aron wer, a̱ de gbe nyôron ken icighanjiir ken atô u ikondo i yisan sha ishigh ki ijiir i nan iwom her, i i lu sha areki la, hanma shighe tsô ga, sha er una kpe ga yô, gadia ka ken ibeen M ande sha ijiir i nan iwom her la ye.

³Akaa a Aron una nyôr a mi ken icighanjiir yô, ka: Gumbua sha ci u nagh ku isholibo man nomiyôngo sha ci u nagh ku nanden.

⁴A̱ haa icighanriga u sha ikondo i pupuu, shi a̱ huwa ifo i sha ikondo i pupuu, a̱ cir idyelegh na, a̱ zer tsar u sha ikondo i pupuu shin iwenge man a̱ kange atsar a sha ikondo i pupuu sha ityou; ka uicighanmbaakondov je, a̱ ôô iyol sha mnger man una haa ve ye.

⁵A̱ ngohol ukpev uhar hen ior i Mbaiserael sha ci u nagh ku isholibo, man nomiyôngo môm sha ci u nagh ku nanden.

⁶Man Aron a̱ va a nombua u nagh ku isholibo ku ku lu sha ci na la, a̱ na iwom sha ci na iyol na kua ya na kpaa.

⁷Shi a̱ kôr ukpev mba uhar mbala, a̱ ver ve sha ishigh ki TER, hen hunda u tenti u kohol ker la.

⁸Aron a̱ er ishor sha ukpev mba uhar mbala, ishor i môm sha ci u TER, i môm sha ci u Asasel;

⁹Aron a̱ va a kpev u ishor i gbe sha mi sha ci u TER la, a̱ na nagh ku isholibo a mi.

¹⁰Kpa kpev u ishor i gbe sha mi sha ci u Asasel la, a̱ ver un uma sha ishigh ki TER, sha u i̱ na iwom sha na, i̱ pase un a̱ yem ken toho sha ci u Asasel, ken desereti.

¹¹Nahan Aron a̱ va a nombua u nagh ku isholibo ku ku lu sha ci na la, a̱ na iwom sha ci na iyol na kua ya na, a̱ sôngo nombua u nagh ku isholibo ku ku lu sha ci na iyol na la;

¹²a̱ iv gbande a akausu a kpenger kpenger a sha atse a nanden nagh sha mi sha ishigh ki TER la, shi a̱ iv kwaghhumandoon u i kum un kpur kpur yô, ken ave na, a̱ nyôr a mi ken atô u ikondo i yisan;

¹³a̱ penda kwaghhumandoon la sha usu, sha ishigh ki TER, mnyim ma kwaghhumandoon ma cir ijiir i nan iwom her la, i i lu sha shiada la, sha er una kpe ga yô;

¹⁴a̱ er awambe a nombua la sha ihôwe, a̱ mishi sha ijiir i nan iwom her la, vegher u sha ityoughkitaregh; man sha ishigh ki ijiir i nan iwom her la kpaa, a̱ er awambe sha ihôwe a̱ mishi kwa taankaruhar.

¹⁵Tsô a̱ sôngo kpev u nagh ku isholibo u a lu sha ci u ior la, a̱ nyôr a awambe na ken atô u ikondo i yisan la, a̱ er a awambe na er a er a awambe a nombua la nahan, a̱ mishi sha ijiir i nan iwom her la, kua sha ishigh ki ijiir i nan iwom her la kpaa;

¹⁶a̱ na iwom sha ci u icighanjiir sha ci u mlu u wang ga, u Mbaiserael, kua afer a ve kpaa, ka asorabo a ve la cii; kape a̱ er sha ci u tenti u kohol ker kpaa la, u a lu hen a ve ken atô u mlu ve u wang ga la.

¹⁷Ma or nana̱ de luun ken tenti u kohol ker la, zum u una nyôr sha u za nan iwom ken icighanjiir la ga, saa una kar duen er a vande nan iwom kera sha ci na iyol na man mba hen ya na kua mkohol u ior i Mbaiserael cii.

¹⁸Nahan a̱ due a̱ za hen atse a nanden nagh sha mi a a lu sha ishigh ki TER la, a̱ za na iwom sha ci u a; a er awambe a nombua kua a kpev la, a̱ felegh sha akoratseegh, a̱ ningir a̱ tser.

¹⁹A̱ mishi awambe sha a kwa taankaruhar sha ihôwe na, a̱ wanger a, shi a̱ tsegha a kpaa, sha ci u mlu u Mbaiserael u wang ga la.

²⁰Una kuren tom u nan iwom sha ci u icighanjiir man tenti u kohol ker la, kua atse a nanden nagh sha mi yô, a̱ va a kpev u uma la.

²¹Yô, Aron a̱ penda ave na ahar cii sha ityough ki kpev u uma la, a̱ pase afer a Mbaiserael cii sha mi, akaabo a ve, asorabo a ve la cii; a̱ haa sha kpev la; tsô a̱ na un sha ikev i or u i vande veren nan yô, nana̱ yem a mi ken desereti;

²²kpev la una tôô afer a ve cii sha iyol na, una yem a a ken tar u or lu ga yô; nana̱ za pase kpev la ken desereti je.

²³Aron a̱ nyôr ken tenti u kohol ker la, a̱ er akondo a sha ikondo i pupuu a a hee a nyer a mi ken icighanjiir la, a̱ undu a ker;

²⁴a̱ ôô iyol sha mnger hen icighanjiir, a haa akondo a na, a̱ due, a̱ na nagh ku nanden sha ci na, man nagh ku nanden ku sha ci u ior la; a̱ na iwom sha ci na iyol na kua sha ci u ior kpaa.

²⁵Ahôm a nagh ku isholibo la yô, a̱ nande sha atse a nan nagh sha mi.

²⁶Man or u nana za pase kpev u Asasel la, nana ôô akondo a nan, shi nana̱ ôô iyol sha mnger kpaa, ken masetyô yô, nana̱ nyôr ken afo.

²⁷Nombua u nagh ku isholibo man kpev u nagh ku isholibo, u i nyer a awambe a ve sha u nan iwom a mi ken icighanjiir la yô, i̱ tôô i̱ due a mi ken akôngoafogh, i̱ za nande akôv a ve man inyam ve kua icômbov ve sha usu.

²⁸Or u nana nande la kpaa, nana̱ ôô akondo a nan, shi nana̱ ôô iyol i nan sha mnger; ken masetyô yô, nana nyôr ken afo.

²⁹I̱ hingir ne tindi u gbem sha won je; uwer u sha utaankaruhar sha ayange a u pue la, ule nen, hanma injatom kpaa de eren nen ga, shin a lu or u tar la jim, shin shiror u nan lu shir her a ven kpaa;

³⁰gadia sha iyange la, á na iwom sha ci wen, sha er á wanger ne yô, asorabo a en a sha ishigh ki TER la cii á wanger ne a kera.

³¹I̱ lu ne iyange i memen i kôron ma tom ave je ga, ule nen, ka tindi u gbem sha won je.

³²Man pristi u á shighe nan mkurem, á tsegha nan er nana̱ lu pristi sha ityough ki ter u nan la, ka nan nana naan iwom ye, nana haa akondo a sha ikondo i pupuu, ka uicighanmbaakondov je la;

³³nana na iwom sha ci u icighanjiir, shi nana na iwom sha ci u tenti u kohol; ker la, man sha ci u atse a nanden nagh sha mi kpaa, nana na iwom sha ci u upristi man ior i mkohol la cii kpaa.

³⁴I̱ hingir ne tindi u gbem sha won je, u nan iwom sha ci u Mbaiserael sha ci u asorabo a ve cii, hanma inyom kwa môm. Tsô a er er TER kaa Mose nahan.