Read tiv Levitiku 25 Bible Online

Levitiku 25 - tiv bible

Levitiku 25

¹TER ôr kwagh a Mose sha uwo u Senai, A kaa er:

²Ôr kwagh a Mbaiserael, kaa a ve wer: Zum u né nyôr ken tar u M lu nan ne la yô, tar la u̱ mem iyol sha ci u civir TER.

³Kaha sule wou anyom ataratar, sôr sule wou u wain, anyom ataratar, sunda iyiav mbi ken u;

⁴kpa inyom i sha utaankaruhar la yô, inya i̱ mem iyol gil gil, ka mmem sha ci u civir TER je, de kera lee kwagh ken sule wou ga; sule wou u wain kpaa, de kera ser u ga.

⁵Iyiav youv mbi mbi gbe menden tsô yô, de kera sondo mbi ga; atam a ikon i wain you i u ser i ga la kpaa, de kera sondo a ga; inya i̱ mem iyol inyom la cii.

⁶Kwagh u a gbe menden shighe u inya i mem la yô, una hingir kwaghyan wen, sha ci wou man kpan wou u nomso man kpan wou u kwase man or u eren we tom sha tôndo kua shiror u nan nyer u a nyôr la;

⁷man sha ci u ilev you man ishôso i hen tar wou; iyiav mbi keregh cii mbia hingir kwaghyan ve.

⁸Ôr ulahadi mba anyomov utaankaruhar, ka anyom ataankarahar kwa taankaruhar je la. Nahan ayange a ulahadi mba anyomov utaankaruhar la, aa hingir we anyom akunduahar kar ataankaranyiin je.

⁹Shighe la, tindi i̱ tôngon korough ku kaan sha uwer u sha utaankaruhar sha ayange a u pue la; sha iyange i nan iwom la, né tindi i̱ tôngon korough ku kaan ken tar wen cii ye.

¹⁰Tsegha nen inyom i sha akunduahargber la, yôô nen mpase u i pase i toho, ken tar la, hen mba ve tem ken u cii, i̱ lu ne inyom i jubilii; hanma or wen nana̱ hide hen kwagh u nan, hanma or wen kpaa nana̱ hide hen ior mba nan.

¹¹Inyom i sha akunduahargber la, i̱ lu ne jubilii, de kera lee nen kwagh ga, de kera sondo nen kwagh u a gba menden iyol na tsô, kpaa ga; man shi de sondo nen atam a ikon i wain i i ser i ga la, kpaa ga.

¹²Gadia ka inyom i jubilii; i̱ lu ne icighankwagh je; za tôô nen a tôô iyiav mbi ken sule, yaan nen.

¹³Sha inyom i jubilii la, hanmô wen nana̱ hide hen kwagh u nan.

¹⁴Nahan yô, aluer wea tee or u nan we ndor a we ma kwagh, shin wea yam ma kwagh a or u nan we ndor a we yô, orgen nana̱ de kera nzughul a orgen ga;

¹⁵ka sha iyenge ia nyom a a kar jubilii la, u yam kwagh a or u nan we ndor a we ye, ka sha iyenge i anyom a á va sunda kwagh sha a la, man nana̱ tee ye.

¹⁶Ka sha mngee u anyom man ú seer ishe i u ye, shi ka sha mndahar u anyom man ú pande ishe i u ye; gadia ngu teen we sha iyenge i ú va sundan yô.

¹⁷Orgen nana̱ de nzughul a orgen ga, kpa cian Aôndo wou; gadia ka Mo TER M lu Aôndo wen ye.

¹⁸Yô, eren nen sha akaawan a Am, man waan nen akaaôron Am a jirigh iko eren nen sha mi; ka nahan man né tema ken tar la bem bem ye.

¹⁹Tar ua doo iyiagh, né ya, á kuma ne, né tema ken u bem bem.

²⁰Aluer nea kaa ner: Sé ya nyi ken inyom i sha utaankaruhar la, aluer sé lôô ga, shi sé sunda iyiagh yasegh kpaa ga yôô?

²¹Yô, Mo Me na ne iveren Yam sha inyom i sha ataratar la, iyiagh kia ngee kia kuma anyom atar je.

²²Sha inyom i sha anigheni la, né lôô, kpa né yaan iyiagh ki tsegh kila her; zan zan iyiagh ki inyom i sha utaankarunyiin la kia via, né yaan iyiagh ki tsegh kila her.

²³I̱ de teen inya la i̱ saan ga; gadia ka inya Yam, gadia ne mba mbavannya man ushirmbaiorov Av.

²⁴Inya i ken tar wen cii, rumun nen, i̱ paa i.

²⁵Aluer anngôu nana gba ican je nana pande kwagh u nan, nana tee yô, orpaan u nan u a hembe lun angbian a nan ikua ikua la, a̱ va paa kwagh u anngô na lu tee la.

²⁶Man aluer or ngu a or u paan kwagh u nan ga, man nan iyol i nan nana va hingir ornyar nana zua a kwagh u a kom u paan yô,

²⁷nana̱ ôr anyom a nan tee kwagh u nan la, nana̱ hide or u yan yam la a kwagh u a shi her yô, tsô nana hide hen kwagh u nan la.

²⁸Kpa aluer nana zua a kwagh á kuma u paan kwagh u nan la ga yô, kwagh u nan tee la, a̱ gba lun sha ikev i u nan yam la tsô, zan zan inyom i jubilii; á va kuma sha jubilii yô, kwagh la una due; tsô, nana hide hen kwagh u nan.

²⁹Man aluer or nana tee iyou ken gar u i maa un gir yô, nana lu a ian i paan i inyom i môm er nan tee i kera la; inyom jimin cii nana lu a ian i paan i.

³⁰Kpa aluer á paa i ken inyom i môm la ga yô, iyou shon i ken gar u i maa un gir la, ia hingir i u nan yam i la gbem sha ikov ikov cii; ia kera due sha inyom i jubilii la kpaa ga.

³¹Kpa ayou a ken angarev mba kiriki mba i maa gir i we ve atô ga yô, i̱ nengen ve er ka mkôngom ma tar la nahan, ian i paan a ngi, man aa due ken jubilii kpaa.

³²Kpa agar a Mbalevi yô, ayou a ken agar a a lu a ve yô, Mbalevi vea lu a ian i paan a hanma shighe cii.

³³Man aluer Orlevi nana paa i ga yô, iyou i i tee i, i ken gar u nan la, ia due ken jubilii; gadia ayou a ken agar a Mbalevi ka kwagh ve, ken ônov mba Iserael.

³⁴Kpa ajiir a ilev mbi ye toho her, ken akôngo a agar a ve la yô, i̱ de teen a ga, gadia ka kwagh ve gbem.

³⁵Aluer anngôu u a lu a we una gba ican je kwagh a hemba un yô, wase un, a̱ lu a we er orvannya man shiror nahan.

³⁶De kera ngohol mngerem hen a na ga, shin mtsera kpaa ga, kpa cian Aôndo wou sha er angôu una tema a we yô.

³⁷De pwaren un inyaregh you wan un mngerem ga, man shi de ne un akaayan a ou, ngohol mtsera sha mi kpaa ga.

³⁸Ka Mo TER M lu Aôndo wen, u M dugh a ven ken tar u Igipiti, sha u Me na ne tar u Kanaan, Me lu Aôndo wen kpaa ye.

³⁹Aluer anngôu u a lu a we una gba ican je una tee iyol na, wea yam yô, de kera gem un a̱ eren we tom er ka kpan nahan ga;

⁴⁰a̱ lu a we er ka ortom u sha tôndo man er shiror nahan, a̱ eren we tom zan zan inyom i jubilii,

⁴¹tsô una due hen we a ônov nav cii, una hide hen ityô na, hen ijiir i uter nav la.

⁴²Gadia ve ka mbayev Av je, mba m dugh a ve ken tar u Igipiti; yô, i̱ de teen ve er ka ikpan nahan ga.

⁴³De ye tor sha a na eren un ican ga, kpa cian Aôndo wou.

⁴⁴Sha kwagh u ikpan you i nomso man i ukase i ú va zua a mi yô, ka akuraior a a kase ne la, man né yamen ikpan i nomso man i ukase ker ye.

⁴⁵Man shi ônov mba ior mba van a va mba ve lu shir hen a ven la kpaa, ka ve né yamen ye, kua ior vev mba ve mar ken tar wen ve lu a ven imôngo la, ka ve vea lu kwagh wen ye.

⁴⁶Ka ve né gema ve vea hingir dyako u ônov enev mba ken ijime yen ye, ka ve vea lu ikpan yen gbem ye; kpa anmgbianev enev Mbaiserael yô, môgen nana̱ de ye tor sha anngô u nan eren nan ican ga.

⁴⁷Aluer orvannya shin shiror u a lu a we una hingir ornyar, man anngôu u a lu a na una hingir icanor, una gema iyol na una tee orvannya la a yam, shin a lu shiror, u a lu a we la, shin or u ken tsombor u orvannya kpaa,

⁴⁸ian ngi i á paan un zum u a tee iyol na kera la, mô anngô na nana̱ paa un;

⁴⁹shin a lu anngô u ter na, shin wan u anngô u ter na kpaa, nana̱ paa un, shin hanma or u nan zough ityô a na, nana̱ paa un; man aluer un iyol na una hingir ornyar yô, a̱ paa iyol na;

⁵⁰a̱ ôr iyenge a or u nan yam un la, hii sha inyom i a tee iyol na a nan la, zan zan ar sha inyom i jubilii, ishe i i tee un la, i̱ lu sha iyenge i anyom la vough; mlu na her a nan la, a̱ lu er ka or u eren tom sha tôndo nahan.

⁵¹Aluer anyom shi her ngee yô, ka sha mngee u a la man una hide a inyaregh ki paan iyol na, ki ki shi her, sha inyaregh ki iyange i yam un a mi la ye.

⁵²Man aluer anyom a mase shin ciôn man inyom i jubilii ia kuma yô, a̱ ôr iyenge a nan; ka sha iyenge i anyom la man una hide a inyaregh ki paan iyol na mi ye.

⁵³A̱ lu a nan er or u eren tom sha tôndo anyom anyom nahan, nana̱ de ye tor sha a na nana̱ eren un ican sha ishigh you ga.

⁵⁴Aluer á paa un sha igbenda ne ga yô, una due sha inyom i jubilii, un a ônov nav cii.

⁵⁵Gadia Mbaiserael ka mbayev Av, ka mbayev Av je, mba M dugh a ven ken tar u Igipiti yô; ka Mo TER M lu Aôndo wen ye.